टि–२० सिरिजका लागि नेपालालाई नामिबियाको प्रस्ताव
काठमाडौं, फागुन २३ : नामिबियाले नेपाललाई टि–२० सिरिजका लागि प्रस्ताव गरेको छ। आईसीसी विश्वकप लिग २ अन्तर्गत सातौँ चरणको त्रिदेशीय एकदिवसीय ....
काठमाडौं, फागुन २३ : नामिबियाले नेपाललाई टि–२० सिरिजका लागि प्रस्ताव गरेको छ। आईसीसी विश्वकप लिग २ अन्तर्गत सातौँ चरणको त्रिदेशीय एकदिवसीय क्रिकेट सिरिज नामिबियामा हँदैछ।
त्रिदेशीय सिरिजमा घरेलु टोली नामिबियासँगै नेपाल र स्कटल्याण्ड रहने छन्।
विश्वकप छनोटको पहिलो चरणको रुपमा रहेको लिग-२ को सातौं चरणको सिरिज अप्रिल २० देखि २७ सम्म चल्नेछ।
सिरिजमा हरेक टिमले दुई खेल खेल्ने छन्। खेलको तालिका भने सार्वजनिक भएको छैन।
तर, घरेलु टोली नामिबियाले लिग-२ अन्तर्गतको एकदिवसीय सिरिज अघि नेपाल र स्कटल्याण्डसँग टी-ट्वान्टी अन्तर्रा्ष्ट्रिय सिरिज समेत खेल्ने चाहना व्यक्त गरेको छ।
टी-ट्वान्टी सिरिजका लागि नामिबियाले नेपाल र स्कटल्याण्डलाई प्रस्ताव गरेको छ।
नेपाल क्रिकेट संघ (क्यान) का सचिब अशोकनाथ प्याकुरेलले एकदिवसीय सिरिज अगाडी टी-ट्वान्टी सिरिजका लागि नामिबियाले प्रस्ताव गरेको खेलपाटीलाई जानकारी गराए।
'नामिबियाले टी-ट्वान्टी अनतराष्ट्रिय सिरिजको लागि नेपाललाई प्रस्ताव गरेको हो,’ क्यानका सचिब प्याकुरेलले भने, 'विश्वकप लिग-२ खेल्नु अघि टी-ट्वान्टी अनतराष्ट्रिय सिरिजको लागि प्रस्ताव गरेको छ।’
नामिबियाले प्रस्ताव गरेपनि टी-ट्वान्टी सिरिज हुने नहुने तय भइनसकेको उनले बताए।
'स्कटल्याण्ड र नेपालले आईसीसीसँग छलफल गर्दा अनुमति पायौं भने टी-ट्वान्टी सिरिज खेल्ने छौं,’ प्याकुरेलले थपे,’टी-ट्वान्टी सिरिज खेल्ने भएमा नेपाली टिम तोकिएको समय भन्दा चाँडै नामिबिया जानेछ।’
आईसीसी विश्वकप लिग-२ मा ७ राष्ट्र सहभागी रहेका छन्। हरेक टिमले ३६ एकदिवसीय अन्तराष्ट्रिय खेल खेल्ने छन् । जसमा अंक तालिकाको शीर्ष तीनमा अटाउने राष्ट्रले एक दिवसीय विश्वकपको छनोट प्रतियोगितामा सहभागिता जनाउन पाउने छ।
तालिकाको शीर्ष तीनमा स्थान नबनाउने राष्ट्रले विश्वकप छनोटको लागि प्लेअफ खेल्नु पर्ने छ।
