बचतकर्तालाई अन्यायमा पर्न नदिने अर्थमन्त्रीको प्रतिबद्धता

नवलपरासी, मंसिर १९ : अर्थमन्त्री डा. प्रकाशशरण महतले बचतकर्तालाई सरकारले अन्याय गर्न नसक्ने स्पष्ट पारेका छन्। 
मंगलबार नवलपरासीमा स्थापित रेडबुल फ्याक्ट्रीको उद्घाटन गर्ने क्रममा उनले ऋण मिनाहा भनेको बचतकर्ताको बचत सकिनु भएको भन्दै उनले बचतकर्तालाई सरकारले अन्याय गर्न नसक्ने बताए। 

उनले भने, ‘ऋण तिर्दिन भन्नु समस्याको समाधान होइन। यो बचतकर्ताको पैसा हो। ऋण मिनाह भनेको बचतकर्ताको बचत सकिनु हो। त्यसको क्षतिपूर्ति कसले तिर्ने ? त्यही पैसा फिर्ता भएर बचतकर्ताले आवश्यक पर्दा लिन सक्छन। बचतकर्तालाई सरकारले अन्याय गर्न सक्दैन। सहकारी, वित्तीय संस्था र बैंकबाट धेरैले ऋण लिएका छन्, तिर्न कठिनाइ भएको छ। त्यसकारण अर्थतन्त्र खत्तम भयो भनेर प्रचारबाजी भएको छ। 

उनले थाइल्यान्डमा उत्पादन सुरु भएको रेडबुल ब्रान्ड आयात रोकिएपछि फ्याक्ट्री नै नेपाल आएको भन्दै यसबाट देशका राजश्व र रोजगारीको अवसर तीन गुणा बढ्ने पनि बताए।  उनले भने, ‘रेडबुल अब नेपालमै उत्पादन सुरु भएको छ, यसले रोजगारी दिनेछ, माग अनुसार तीनवटै सिफ्ट फ्याक्ट्री सञ्चालन भयो भने तीन गुणा रोजगारी बढ्छ। आम्दानी पनि यो क्षेत्रका लागि तीन गुणा बढ्छ, सँगसँगै राजश्व पनि देशका लागि तीन गुणा बढ्छ।’ 

सरकारले जति धेरै आम्दानी गर्छ, त्यत्ति नै पूर्वाधारमा लगानी गर्न सक्ने भन्दै यसका लागि निजी क्षेत्रबाट लगानी वृद्धि हुनु आवश्यक भएको उनको भनाई छ। उनले भने, ‘सरकारले फ्याक्ट्री चलाएर हुँदैन, यो निजी क्षेत्रले चलाउनुपर्छ। उद्यमशील नागरिकले फ्याक्ट्री चलाउनुपर्छ। सरकारले प्रतिस्पर्धा सुनिश्चित गर्छ, गुणस्तर जाँच गर्छ। एउटैले आदिपत्य जमाएको छ भने त्यो सरकारले हेर्छ। यस्तो परिवेशमा धेरै लगानी आउँछ, लगानी आएपछि रोजगारी बढ्छ। रोजगारी बढेपछि आम्दानी बढ्छ, आम्दानी बढेपछि राज्यको राजश्व बढ्छ। राजश्व बढ्यो भने शिक्षा, जनस्वास्थ्यलगायत हाम्रा आवश्यकताअनुसारको पूर्वाधार विकासमा सरकारले बढी लगानी गर्न सक्छ।’

उनले निजी क्षेत्रलाई उत्पादनमा लगाइयो भने श्रोत बनाउन नसकिने भन्दै यही सिद्धान्तमा नेपाली कांग्रेस र यो गठबन्धन सरकार चलेको बताए।