१३ अर्ब बढीको विकास ऋणपत्र निष्कासन गर्दै राष्ट्र बैंक
आठ वर्ष अवधिको ‘विकास ऋणपत्र २०८८–ग’ बोल कबोल प्रक्रियाद्वारा निष्काशन गर्न लागिएको राष्ट्र बैंकले जनाएको छ।
काठमाडौं, असाेज १४ : नेपाल राष्ट्र बैंकले १३ अर्ब १० करोड बराबरको विकास ऋणपत्र निष्कासन गर्ने भएको छ।
आठ वर्ष अवधिको ‘विकास ऋणपत्र २०८८–ग’ बोल कबोल प्रक्रियाद्वारा निष्काशन गर्न लागिएको राष्ट्र बैंकले जनाएको छ।
२०८८ असोज १५ गते साँवा भुक्तानी हुने यो ऋणपत्रको ब्याजदर बोल कबोल प्रकृयाबाट निर्धारण हुनेछ। ब्याज भुक्तानी अर्धवार्षिक रुपमा हुने र आर्जित ब्याजमा समेत ब्याजकर लाग्ने पनि राष्ट्र बैंकले जनाएको छ।
यो ऋणपत्र बैंक तथा वित्तीय संस्था, बीमा कम्पनी, गैर बैंक वित्तीय संस्था,संगठित संस्था तथा सर्वसाधारण नागरिकले खरिद गर्न पाउनेछन्। उल्लेखित सबैले बोलकबोल प्रक्रियामा आज दिउँसो ३ बजेसम्ममा भाग लिन सक्नेछन्।
यो ऋणपत्रको इच्छुक खरिदकर्ता प्रतिस्पर्धी वा अप्रतिस्पर्धी रुपमा सहभागी हुन सक्ने छन्। प्रतिस्पर्धी र अप्रतिस्पर्धी बोलवालाहरुलार्ई क्रमशः निष्काशित रकमको ८५ र १५ प्रतिशत छुट्याइएको छ। बोलकबोलमा घटीमा रू ५० हजार र बढीमा कुल निष्काशित रकमको सीमामा नबढाइ रू ५० हजारले भाग गर्दा निःशेष भाग जाने अङ्कमा खरिद गर्न सकिनेछ।
यस ऋणपत्रको दोस्रो बजार कारोबार नेपाल स्टक एक्सचेञ्ज लिमिटेडमार्फत् हुने राष्ट्र बैंकले जनाएको छ।
