दाप्चामा मुटुरोग सम्बन्धी विशेषज्ञसहितको स्वास्थ्य शिविर

काभ्रे, भदाै २० : दाप्चा र नमोबुद्ध नगरपालिका वडा नं ८ स्थित दाप्चा माध्यमिक विद्यालयमा मुटुरोग सम्बन्धी विशेषज्ञसहितको स्वास्थ्य शिविर सञ्चालन गरिएको छ।

श्रीकृष्णजन्माष्टमीको अवसर पारेर नमोबुद्ध सेवा समाज, काठमाडौंको आयोजनामा मुटुरोग सम्बन्धी निशुल्क स्वास्थ्य शिविर आयोजना गरिएको हो। शिविरमा २ सय ५४ जना लाभान्जित भएको आयोजक नमोबुद्ध सेवा समाजका अध्यक्ष विरेन्द्र लामाले जानकारी दिए।

वरिष्ठ मुटुरोग विशेषज्ञ प्राध्यापक डा। अंगदमणि श्रेष्ठको नेतृत्वमा डा. शरद ओली, डा. तिलक पन्त, डा. सनी थापा, डा. उमेशप्रसाद यादव, डा. चन्दन कुशवाह लगायत स्वाथ्यकर्मीहरुको टोलीले स्वास्थ्य परिक्षण गरेको हो। मुटुरोग तथा अन्य रोग सम्बन्धी स्वास्थ्य परिक्षण तथा परामर्श, निशुल्क औषधी वितरण, निशुल्क इसिजी सेवा, निशुल्क प्याथोलोजी ल्याव साथै रगत, पिसाव निशुल्क परिक्षण गरिएको थियो।

स्वास्थ्य शिविरको नमोबुद्ध नगरप्रमुख कुन्साङ लामाले उद्धघाटन गरे। उनले आफ्नो जन्मभूमीको माया गरेर निशुल्क शिविर सञ्चालन गरेकोमा आयोजकलाई धन्यवाद दिदै यस्ता सामाजिक काममा नगरपालिका सहयोग गर्न तयार रहेको बताए।

कार्यक्रममा वडा नं ८ का अध्यक्ष शेरबहादुर तामाङ, वडा नं. १० का अध्यक्ष रामकृष्ण उपाध्याय, ११ का वडा अध्यक्ष कृष्णबहादुर तामाङ, नगर युवा परिषद्का कार्यकारी उपाध्यक्ष रामेश्वर अधिकारी, आयोजक संस्थाका पदाधिकारी लगायत स्थानीयको उपस्थिती थियो।  

कार्यक्रमको समापन गर्दै नगर उपप्रमुख रत्नबहादुर लामाले यस्ता सामाजिक कामको निरन्तरता अपेक्षा गरे। आयोजकले कार्यक्रममा सहयोग गर्ने सबै व्यक्ति र संस्थालाई प्रशंसापत्र प्रदान गरेको छ। जन्मभूमिको सेवा गर्ने उद्धेश्यले नमोबुद्धमा जन्मिएर देशका विभिन्न भागमा रहेका नगरवासीले सामाजिक संस्था दर्ता गरेका हुन्।