पाकिस्तान एसँग नेपाल ४ विकेटले पराजित
पहिला ब्याटिङ गर्दै नेपालले दिएको १८० रनको लक्ष्य पाकिस्तान एले ३२.४ ओभरमा ६ विकेट गुमाउँदै भेट्टायो।
काठमाडाैं, असार २९ : एसिसी इमर्जिङ टिम्स एसिया कपको पहिलो खेलमा नेपाल पराजित भएको छ। श्रीलंकामा शुक्रबार भएको खेलमा नेपाल पाकिस्तान एसँग ४ विकेटले पराजित भएको हो।
पहिला ब्याटिङ गर्दै नेपालले दिएको १८० रनको लक्ष्य पाकिस्तान एले ३२.४ ओभरमा ६ विकेट गुमाउँदै भेट्टायो। उसका लािग महुम्मद तयाब ताहिरले ६७ बलमा सर्वाधिक ५१ रन बनाए। यस्तै, ओमाइर बिन युसाफले ३६ कमरान गुलामले ३० र सइम अयुबले २४ रनको योगदान दिए।
नेपालका लागि ललित राजवंशीले ३ तथा पवन सर्राफले २ विकेट लिए। ललितले ७.४ ओभरमा ४१ रन खर्चिए पवनले ५ ओभरमा १५ रन खर्चिए।
त्यसअघि पहिला ब्याटिङ गरेको नेपालले ३७ ओभरमा अलआउट हुँदै १७९ रन मात्र बनाउन सक्यो। सुरुआती ब्याट्सम्यानहरू सस्तैमा आउट भएपछि दबाबमा परेको नेपालको इनिङ सोमपाल कामीले सम्हालेका थिए।
७५ रनमा ८ विकेट गुमाएको नेपालका लागि सोमपालले बहादुरीपूर्ण ब्याटिङ गरेपछि नेपाल ३७ ओभरमा १७९ रनमा अलआउट भयो। अन्तिम विकेटका लागि आउट भएका सोमपालले १०१ बल ९ चौका र २ छक्का प्रहार गर्दै ७५ रन बनाए।
सामोपाल र प्रतिश जिसीले नवौं विकेटका लागि महत्वपूर्ण अर्धशतकीय साझेदारी गरेपछि नेपालले सम्मानजनक योगफल बनाएको हो। प्रतिशले २४ बलमा १ चौका र २ छक्का प्रहार गर्दै २६ रन बनाए।
तल्लो क्रमका ब्याट्सम्यानले राम्रो योगदान दिएपनि नेपलाको माथिल्ले क्रमका ब्याट्सम्यानले पाकिस्तानी आक्रमण झेल्न सकेन। नेपालले पहिलो पावर प्लेमै महत्वपूर्ण ६ विकेट गुमाएको थियो।
नेपालको माथिल्लो क्रममा लागि अर्जुन साउदले २० बलमा २ चौका र १ छक्का प्रहार गर्दै सर्वाधिक १७ रन बनाउँदा आसिफ सेखले १२ बलमा ३ चौका प्रहार गर्दै १२ रन बनाए।
कप्तान रोहितकुमार पौडेलले ४ रन बनाउँदा कुशल मल्ल र पवल सर्राफले समान १ रन बनाए भने भीम सार्की शुन्य रनमा आउट भए। तल्लो क्रममा गुल्सन झाले १९ बलमा १३ रन बनाए।
नेपालको इनिङ धरासयी बनाउने क्रममा पाकिस्तानका फास्ट बलर सहनवाज धानीले १० ओभरमा ३८ रन मात्र खर्चेर ५ विकेट लिए भने मुहम्मद वासिमले १० ओभरमा ५१ रन खर्चेर ४ विकेट लिए।
