अख्तियारको टोलीले घुस लिने र दिने दुवैलाई पक्रियो

काठमाडौं, माघ २० : अख्तियार दुरुपयोग अनुसन्धान आयोगले घुस लिने र दिने दुवै जनालाई पक्राउ गरेको छ।

काठमाडौंको स्वयम्भुस्थित यातायात व्यवस्था सेवा कार्यालयका अधिकृत शिवलाल पौडेल र सेवाग्राही दीपक खतिवडालाई नियन्त्रणमा लिएको हो। शिवलाललाई दीपकले सवारी कर र प्रदुषणबापतको रकम तिर्नका लागि घुसबापत १३ हजार दिँदै गर्दा पक्राउ गरेको हो।

अख्तियारको केन्द्रीय कार्यालयबाट खटिएको टोलीले उनीहरु दुवै जनालाई पक्राउ गरेको हो। दुवै जनामाथि अनुसन्धान भइरहेको अख्तियारले जनाएको छ।