भारतले जित्यो काभा महिला भलिबल उपाधि

काठमाडाैं, जेठ १४ : काभा महिला भलिबल च्यालेन्ज कपको उपाधि भारतले जितेको छ। आइतबार त्रिपुरेश्वरस्थित राखेप कभर्ड हलमा भएको फाइनलमा काजकिस्तानलाई ३–०को सोझो सेटमा हराउँदै भारतले उपाधि जितेको हो।

भारतले काजकिस्तानलाई २५–१५, २५–२२ र २५–१८ले हरायो। भारत उज्वेकिस्तानलाई हराउँदै फाइनल पुगेको थियो भने काजकिस्तानले नेपालको चुनौती पन्छाएको थियो।

भारतले अपराजित रहँदै उपाधि जितेको हो। उसले समूहमा तीनै खेले जितेको थियो । भारतले पहिलो पटक प्रतियोगितामा सहभागी जनाएको हो।

यसअघिका २ उपाधि जितेको नेपालले भने तेस्रो स्थानमा चित्त बुझायो। आजै भएको खेलमा नेपालले उज्वेकिस्तानलाई ३–१ले हराएको थियो।