फार वेस्टले पोखरालाई हराउँदा काठमाडौं प्लेअफमा
कीर्तिपुरस्थित टियू मैदानमा भएको खेलमा फार वेस्टले पोखरा एभेन्जर्समाथि ४२ रनको जित निकालेपछि चौथो हुँदै काठमाडौं प्लेअफमा पुगेको हो।
काठमाडाैं, पुस १३ : शनिबार भएको नेपाल टि–२० लिगको लिग चरणको अन्तिम खेलमा फार वेस्ट युनाइटेड विजयी भएपछि काठमाडौं नाइट्स प्लेअफमा पुगेको छ ।
कीर्तिपुरस्थित टियू मैदानमा भएको खेलमा फार वेस्टले पोखरा एभेन्जर्समाथि ४२ रनको जित निकालेपछि चौथो हुँदै काठमाडौं प्लेअफमा पुगेको हो।
अन्तिम जितका बाबजुद फार वेस्ट र पारजित भएको पोखरा प्लेअफमा पुग्न सकेनन्। २ जित मात्र निकालेको फार वेस्ट पुछारमा रह्यो भने पोखरा ६ अंकसहित पाँचौं स्थानमा रह्यो । यता, काठमाडौंमा ८ अंकसहित चौथो हुँदै प्लेअफमा पुग्यो।
लिगको अन्तिम खेलमा फार वेस्टलाई जित दिलाउन कप्तान हस्मतुल्लाह शाहिदीले अलराउन्ड प्रदर्शन गरे । उनले ब्याटिङमा अर्धशतक बनाए भने बलिङमा २ विकेट लिए। उनी प्लेअर अफ दी म्याच भए।
फार वेस्टले दिएको १८८ रनको विशाल लक्ष्य पछ्याएको पोखरा १८.१ ओभरमा १४६ रनमै अलआउट भयो । उसका लागि कप्तान उपुल थरंगाले सर्वाधिक ३६ रन बनाए भने युवा अलराउन्डर प्रतिश जिसीले ११ बलमा ५ छक्का प्रहार गर्दै ३४ रन बनाए ।
यस्तै, सिद्धान्त लोहनीले २८ रन बनाउँदा १३ रन बनाए । फार वेस्टक दुर्गेश गुप्ताले ३ विकेट लिँदा शाहिदी र प्रकाश जैसीले समान २ विकेट लिए।
त्यसअघि पहिला ब्याटिङ गरेको फार वेस्टले शाहिदी र विनोद भण्डारीको शतकीय साझेदारीमा ५ विकेटको क्षतिमा १८७ रन बनायो । ओपनिङमा आएका शाहिदी र विनोदले लगारता दोस्रो खेलमा शतकीय साझेदारी गर्ने क्रममा पहिलो विकेटका लागि १३४ रनको सझोदारी गरे।
शाहिदीले ५१ बलमा ६ चौका र २ छक्का प्रहार गर्दै ६७ रन बनाए भने विनोदले ४७ बलमा ६ चौका र २ छक्का नै प्रहार गर्दै ५९ रन बनाए। यस्तै, रसिद खानले १४ र मिलिन्डा सिरिवर्दनाले १२ रन बनाए।
विराटनगरका अभिमन्यु मिथुनले २ तथा प्रतिश जिसीले १ विकेट लिए।
