पोखरामा दुई हेलिकप्टरको आकस्मिक अवतरण

पोखरा, पुस २ : पोखराको मौसममा आएको खराबीले दुई हेलिकप्टरलाई खेल मैदानमा अवतरण गराइएको छ।

एयर डाइनेष्टी र सिम्रिक एयरको हेलिकप्टर पर्यटक लिएर अन्नपूर्ण आधार शिविर गएका थिए। पोखरा विमानस्थल फर्कने क्रममा मौसममा अकस्मात खराबी आउँदा आज बिहान १०ः१० बजे पोखरा महानगरपालिका–१९ लामाचौरस्थित सेती नदी किनारको गोस्तेघाट खेल मैदानमा अवतरण गरिएको छ।

बिहान आधार शिविरतर्फ उडानको क्रममा मौसम अनुकूल रहेपनि फर्कने क्रममा विमानस्थल हुस्सुले ढाकेपछि अवतरण हुन नसकेको हो।

‘‘पोखरा विमानस्थल हुस्सुको कारणले बन्द हुँदा टावरसँगको सम्पर्कमा दुई हेलिकप्टर खेल मैदानमा अवतरण गर्नुपरेको बताइएको छ। मौसम खुल्ने वित्तिकै उड्ने तयारीमा छन्,’’ पोखरा विमानस्थलका सूचना अधिकारी काशीनाथ अधिकारीले भने।

मौसम सफा नहुँदा पोखरा विमानस्थलबाट आज बिहान ११ बजेसम्म कुनै पनि उडान तथा अवतरण हुन सकेका छैनन्।