दुई ट्रक ठोक्किँए, चालकको मृत्यु, तीन घाइते

चितवन, मंसिर ३० : पूर्व–पश्चिम राजमार्गअन्तर्गत पूर्वी चितवनको लोथरमा आज बिहान दुइटा ट्रक एक–आपसमा ठोक्किँदा एक जनाको मृत्यु भएको छ भने तीनजना घाइते भएका छन्।

जिल्ला प्रहरी कार्यालयका अनुसार, ट्रकका चालक हेटौडा उपमहानगरपालिका–१४ का २६ वर्षीय वीरबहादुर लोप्चन मृत्यु भएको छ। पूर्वबाट आउँदै गरेको ना ५ ख ८७४३ नम्बरको ट्रक र विपरीत दिशाबाट गइरहेको ना ६ ख ७९६७ नम्बरको ट्रक आज बिहान ७ः३० बजेको समयमा एकापसमा ठक्कर खाएको हो।

दुर्घटनामा गम्भीर घाइते भएका ना ५ ख ८७४३ नम्बरको ट्रकका चालक लोप्चनको उपचारका क्रममा बिहान ८ः२५ बजे पुरानो मेडिकल कलेजमा मृत्यु भएको हो।

सोही ट्रकका सहचालक मकवानपुरको बागमती गाउँपालिका–१ का २० वर्षीय सोमबहादुर थिङ, ना ६ ख ७९६७ नम्बरको ट्रकका चालक झापाको कन्काई नगरपालिका–१ का ४० वर्षीय अर्जुन जोगी र सहचालक मोरङका २० वर्षीय प्रज्वल देवानको पुरानो मेडिकल कलेजमा उपचार भइरहेको प्रहरीले जनाएको छ ।