चालकलाई कारबाहीबाट १८ लाख राजस्व संकलन

बागलुङ, कात्तिक १२ : बागलुङ जिल्ला ट्राफिक प्रहरी कार्यालयले चालु आर्थिक वर्षको तीन महिनामा सवारी नियम उल्लंघन गर्ने चालकलाई गरेको कारबाहीबाट रु १८ लाख ९७ हजार राजस्व संकलन गरेको छ।

गत साउन, भदौ र असोज महिनामा मात्रै ट्राफिक नियम उल्लंघन गरेका दुई हजार आठ सय ५० चालकबाट सो राजस्व संकलन गरिएको ट्राफिक प्रहरी प्रमुख राजकुमार केसीले बताए।

कारबाही पर्नेमा सबैभन्दा बढी मोटरसाइकल रहेका छन् । उक्त अवधिमा ९ सय ७९ मोटरसाइकलबाट ६ लाख ३९ हजार ५ सय रुपैयाँ राजस्व संकलन भएको छ।

तीन सय ८५ कार र जीपबाट ३ लाख ८८ हजार, ३ सय ४९ ट्रक तथा टिपरबाट २ लाख ४० हजार, ४ सय ९३ ट्रयाक्टरबाट ३ लाख ४२ हजार, चार सय १९ बसबाट २ लाख ७४ हजार पाँच सय र अन्य २२ सवारीसाधनबाट १३ हजार गरी १८ लाख ९७ हजार रुपैयाँ राजस्व संकलन भएको हो।

पछिल्लो तीन महिनाको राजस्व अघिल्लो वर्षको तीन महिनाको तुलनामा झन्डै रु आठ लाखभन्दा बढी हो ।

ट्राफिक प्रहरी प्रमुख केसीले आफूहरुले बागलुङ बजारमा ट्राफिक जाम व्यवस्थापन र दुर्घटना न्यूनीकरणका लागि महत्वपूर्ण भूमिका निर्वाह गरेकोे बताए।