महिलाको सोच : पहिले दक्ष, त्यसपछि जागिर
तालिममा नौ महिना सैद्धान्तिक कक्षा हुनेछ भने बाँकीको १५ महिना तोकिएको उद्योगमा गएर प्रयोगात्मक हुनेछ। प्रयोगात्मक तालिममा प्रशिक्षार्थीले सम्बन्धित उद्योगबाट प्रोत्साहन भत्तासमेत पाउने व्यवस्था मिलाइएको छ।
मोरङ, असोज २५ : मोरङको बूढीगङ्गा गाउँपालिकामा पहिलो पटक सञ्चालनमा ल्याइएको सूचना प्रविधि (आइटी) विषयको रोजगारमूलक औद्योगिक प्रशिक्षण तालिमका लागि पुरूषभन्दा महिला बढी उत्सुक देखिएका छन् ।
बूढीगङ्गा गाउँपालिका–३ को बाँसबारीमा रहेको श्री जनप्रिय माध्यमिक विद्यालयको प्राविधिक तथा व्यावसायिक शिक्षा तालिम केन्द्रले तालिमका लागि छनोट गरेको छ ।
असोज अन्तिमदेखि सुरू हुने तालिम २४ महिनासम्म चल्ने छ । चालिस सिटका लागि सञ्चालन गरिएको प्रवेश परीक्षामा ७० प्रतिशत महिला छनोट भएका छन् । छनोट भएका अधिकांश पिछडा, दलित र विपन्न महिला छन् ।
छनोट भएकी दुहबी–११ की सुजिता मण्डलले महिला शिक्षित हुँदै गएको र स्वतन्त्रतापूर्वक श्रम गरेर बाँच्न सक्षम भएको बताइन्। उनले सीप सिकेर दक्ष बनी उद्योगमा जागिर खाँदा पारिश्रमिक बढी पाइने र काम गर्न पनि सजिलो हुने सुनाइन्।
बूढीगङ्गा–३ की अञ्जली खवासले तालिम लिएर काममा दक्ष हुनेलाई उद्योगमा जागिर खान सजिलो हुने भएकाले आफू पनि तालिममा सहभागी बन्ने उल्लेख गरिन्।
प्राविधिक शिक्षा तथा व्यावसायिक तालिम परिषद् (सिटिइभिटी)को सम्बन्धन प्राप्त तालिम पूर्ण निःशुल्क छ । समाजमा रहेका गरिब, विपन्न, पिछडा समुदायको आर्थिक स्तरोन्नतिका लागि सञ्चालन गर्न लागिएको तालिममा प्रशिक्षार्थीका लागि खान र बस्नसमेतको व्यवस्था गरिएको छ।
तालिममा नौ महिना सैद्धान्तिक कक्षा हुनेछ भने बाँकीको १५ महिना तोकिएको उद्योगमा गएर प्रयोगात्मक हुनेछ। प्रयोगात्मक तालिममा प्रशिक्षार्थीले सम्बन्धित उद्योगबाट प्रोत्साहन भत्तासमेत पाउने व्यवस्था मिलाइएको छ।
तालिमका संयोजक लवकुमार यादवले नेपाली दक्ष भए विदेशबाट उद्योगका लागि कामदार मगाउनु नपर्ने बताए। उनले तालिमका लागि पुरूषभन्दा महिलामा बढी आकर्षण देखिएको बताए।
