त्रिभुवन विमानस्थल वरपर चंगा उडाए कारबाही
दसैं लागेसँगै अहिले विमानस्थललगायत काठमाडौंका विभिन्न स्थानमा चंगा उडाउने कार्य तीव्र रुपमा चलिरहेको छ।
काठमाडाैं, असाेज १२ : त्रिभुवन अन्तर्राष्ट्रिय विमानस्थल वरपर चंगा उडाउनेलाई कारबाही हुने भएको छ।
नेपाल नागरिक उड्डयन प्राधिकरण (क्यान) ले एक सूचना प्रकाशित गरी विमानस्थल वरपर चंगा उडाउँदा हवाई उडानमा खतरा हुने भन्दै सो कार्य तत्काल रोक्न आग्रह गरेको छ।
विमानस्थलमा जहाज उडान तथा अवतरणको समयमा विमानस्थलको आसपासको क्षेत्रमा चङ्गा उडाउँदा विमानको उडान सुरक्षामा गम्भीर असर पर्नसक्ने भएको हुँदा यस किसिमको गतिविधि एवं क्रियाकलाप नगर्ननगराउन सम्बन्धित सबैमा प्राधिकरणले प्रकाशित गरेको सूचनामा जनाइएको छ।
यदि कसैले उक्त सूचनाको अवज्ञा वा अटेर गरी चङ्गा उडाउने कार्य वा गतिविधि गरे तथा गराएको पाइएमा प्रचलित कानुनबमोजिम कडा कारबाही हुनेसमेत प्राधिकरणले चेतावनी दिएको छ।
दसैं लागेसँगै अहिले विमानस्थललगायत काठमाडौंका विभिन्न स्थानमा चंगा उडाउने कार्य तीव्र रुपमा चलिरहेको छ।
