राष्ट्रिय मानवअधिकार आयोगको टोली जबराको निवासमा
विभिन्न सञ्चारमाध्यममार्फत जबराले आफूलाई नजरबन्दमा राखेको बताएपछि आयोगको टोली बालुवाटारस्थित जबराको निवासमा पुगेको हो ।काठमाडौं, असोज २ : राष्ट्रिय मानवअधिकार आयोगको टोली निलम्बित प्रधानन्यायाधीश चोलेन्द्र शमशेर जबराको निवासमा पुगेको छ। विभिन्न सञ्चारमाध्यममार्फत जबराले आफूलाई नजरबन्दमा राखेको बताएपछि आयोगको टोली बालुवाटारस्थित जबराको निवासमा पुगेको हो ।
आयोगले प्रवक्ता टीकाराम पोखरेलको नेतृत्वको टोलीलाई अनुगमनका लागि जबरा निवास पठाएको हो । आइतबार नै आयोगको टोली सर्वोच्च अदालत पनि पुगेको बताइएको छ । अनुगमन टाली फर्किएपछि जबराको अवस्थाबारे आयोगले धारणा सार्वजनिक गर्ने बताइएको छ ।
प्रतिनिधि सभाको महाभियोग सिफारिस समितिको शनिबार बसेको बैठकले चोलेन्द्रलाई महाभियोग लगाउन सिफारिस गर्दै संसदमा प्रतिवेदन बुझाएको थियो । सरकारले हिजो रातीदेखि नै लागू हुनेगरी प्रतिनिधि सभाको अधिवेशन अन्त्य गरेको थियो । संसदको अधिवेशन अन्त्य भइसकेकाले आफूमाथि लगाइएको महाभियोग स्वतः निष्क्रिय भएकाले जबरा आइतबारदेखि सर्वोच्च जाने तयारीमा थिए ।
उनी आउने भनेपछि आइतबार बिहानैदेखि सर्वोच्च अदालतको गेटमा बाक्लो संख्यामा सुरक्षाकर्मी परिचालन गरिएको थियो । त्यतिमात्रै होइन, बालुवाटारस्थित जबराको क्वार्टरमा पनि सुरक्षा सतर्कता बढाइएको थियो । बार एशोसियशनले जबरालाई सर्वोच्च छिर्न नदिने निर्णय गरिसकेको छ ।
जबराले आफ्नो क्वार्टरमा बाक्लो संख्यामा सुरक्षाकर्मी परिचालन गरी आफूलाई नजरबन्दमा राखेको आरोप लगाएका थिए ।