नेप्से परिसूचकमा झिनो अंकको सुधार

काठमाडाैं, भदाै १४ : धितोपत्र बजारमा शेयर कारोबार मापक नेप्से परिसूचक आज पनि झिनो अंकले उकालो लागेको छ।

नेपाल स्टक एक्सचेञ्जका अनुसार नेप्से परिसूचक दुई दशमलव ३३ अंकले उकालो लागेर एक हजार नौ सय ९५ दशमलव ३४ मा पुगेको छ।

यस्तै, ठूला कम्पनीको कारोबार मापन गर्ने सेन्सेटिभ परिसूचक एक दशमलव ४९ अंकले उकालो लागेर तीन सय ८८ दशमलव ९५ मा पुगेको छ।

कूल दुई सय २० कम्पनीको २९ लाख १४ हजार पाँच सय पाँच कित्ता शेयर रु एक अर्ब एक करोड ९५ लाख १६ हजार छ सय ९६ मूल्यमा खरिद बिक्री भए। मंगलबारको कारोबारपछि बजार पूँजीकरण रु २८ खर्ब ६० अर्ब ११ करोड आठ लाख बराबर रहेको छ। 

नेप्सेका अनुसार कारोबार भएका १३ उपसमूहमध्ये आज छ उपसमूहको शेयर मूल्य ओरालो लागेको छ भने सात उपसमूहको शेयर मूल्य उकालो लागेको छ। बैंकिङ शून्य दशमलव ७६, होटल तथा पर्यटन चार दशमलव ८१, जलविद्युत् १८, वित्त १० दशमलव नौ, निर्जीवन बीमा छ दशमलव ३७ र जीवन बीमा दुई दशमलव ३६ अंकले ओरालो लागेको छ।

यस्तै, व्यापार एक दशमलव ५७, विकास बैंक छ दशमलव २३, उत्पादन ११ दशमलव ७३, अन्य ३३ दशमलव ८२, लघुवित्त चार दशमलव २७, सामूहिक लगानी कोष शून्य दशमलव शून्य दुई र लगानी शून्य दशमलव १९ अंकले उकालो लागेको छ।
 
नेप्सेका अनुसार कारोबारका आधारमा नेपाल दूरसञ्चार कम्पनी शीर्ष स्थानमा छ। सो कम्पनीको रु नौ करोड ५७ लाख ७२ हजार पाँच सय ७५ बराबरको कारोबार भयो।

यस्तै, लाइफ इन्स्योरेन्स कर्पोरेशन नेपाल रु छ करोड ३९ लाख एक हजार तीन सय १०, नबिल बैंक रु चार करोड ४९ लाख ९२ हजार पाँच सय ५५, रिडी हाइड्रोपावर रु दुई करोड ९९ लाख छ हजार छ सय १० र हिमाल दोलखा हाइड्रोपावर रु दुई करोड १२ लाख ६० हजार आठ सय ५१ बराबरको कारोबार भई शीर्ष पाँच स्थानमा रहेका छन्। 

नेप्सेका अनुसार, अप्पर हेवाखोला हाइड्रापावर आठ दशमलव  ४५, नबिल ब्यालेन्स फण्ड दोस्रो पाँच दशमलव ३२, ग्लोबल आइएमई समुन्नतत स्किम एक तीन दशमलव ३४ इमर्जिङ नेपाल तीन दशमलव ३४ र लक्षमी उन्नती कोषका लगानीकर्ताले तीन दशमलव ३४ प्रतिशतले कमाएका छन्।

त्यस्तै, विन नेपाल लघुवित्त चार दशमलव ७७, एनआइसी एशिया ग्रोथ फण्ड चार दशमलव शून्य तीन, मल्टीप्रपोज फाइनान्स कम्पनी तीन दशमलव ४३, आरबीबी म्युचुअल फण्ड एक तीन दशमलव ४३ र समता घरेलु लघुबित्तका लगानीकर्ताले तीन दशमलव २५ प्रतिशतले गुमाएका छन्।