साफ यू–२० : श्रीलंका प्रतियोगिताबाट बाहिरियो 

काठमाडौं, साउन १३  : भारतको भुवनेश्वरमा जारी साफ यू २० च्याम्पियनसिप फुटबल प्रतियोगिताबाट श्रीलंका बाहिरिएको छ।

कालिंगा स्टेडियममा शुक्रबार सम्पन्न खेलमा आयोजक भारतसँग ४-० गोल अन्तरले पराजित भएसँगै श्रीलंका एक खेल बाँकी छदै प्रतियोगिताबाट बाहिरिएको हो।  साविक विजेतासमेत रहेको भारतलाई जित दिलाउन पार्थिवसुन्दर गोगोइले २ गोल गरे।

हिमान्सु जान्ग्रा र गुर्किरात सिंहको नाममा १-१ गोल गरे ।  पहिलो हाफ गोलरहित बराबरीमा सकिएको खेलको दोस्रो हाफमा ४ गोल भएको थियो। जितसँगै भारतले २ खेलमा ३ अंक जोडेको छ।

पहिलो खेलमा भारत बंगलादेशसँग २-१ ले पराजित भएको थियो। श्रीलंकाको यो लगातार तेस्रो हार हो। श्रीलंका पहिलो खेलमा बंगलादेशसँग १-० र दोस्रो खेलमा नेपालसँग ३-० ले पराजित भएको थियोे।