स्थायी समिति बैठकमा प्रचण्डको ब्रिफिङ– कांग्रेससहितको गठबन्धनबाट दायाँबायाँ गर्न हुँदैन
प्रचण्डले तत्काल एमालेसँग सहकार्य नगर्ने बताए।
काठमाडौं, साउन १२ : नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी संघ र प्रदेशको निर्वाचनमा नेपाली कांग्रेससँगै सहकार्य हुने बताएका छन्।
बिहीबार बसेको बैठकमा स्थायी कमिटी सदस्यहरुसँग प्रचण्डले कांग्रेससहितको गठबन्धनलाई आगामी निर्वाचनसम्म निरन्तरता दिनुपर्ने बताएका हुन्।
बैठकमा स्थायी कमिटी सदस्यहरुले आगामी संघ र प्रदेशको निर्वाचनमा पार्टीको रणनीति, समाजवादी केन्द्र बनाउने विषय, एमालेसँगको सहकार्य आदिका बारेमा स्पष्ट धारणाको माग गरेका थिए । त्यसबारे ब्रिफिङ गर्दै प्रचण्डले तत्काल एमालेसँग सहकार्य नगर्ने बताएका हुन् ।
‘कांग्रेससँग नै सहकार्य गर्ने हो, अब दायाँ–बायाँ सोच्नुहुन्न । एमालेसँग सहकार्य सम्भव छैन,’ एक स्थायी कमिटी सदस्यले प्रचण्डको भनाई उदृध गर्दै भने।
उनले गठबन्धनभित्रकै वामपन्थी दलहरुबीच मोर्चा बनाएर जाने विषयमा छलफल चलाउन सकिने बताए । मोर्चा बनेपनि पार्टी एकता संयोजन समिति बन्नेबारे कुनैपनि विषय नटुंगिएको प्रचण्डले बताएका थिए।
स्थायी कमिटीलाई पूर्णता दिने र पदाधिकारी चयनका विषयमा छलफल गर्न शुक्रबार पुन बैठक बस्ने नेता हरिबोल गजुरेलले जानकारी दिएका छन्।
