भारतबाट घटेर आउँदा पनि निगमलाई पेट्रोलमा प्रतिलिटर १४.१९ घाटा

काठमाडौं, साउन १ : नेपाल आयल निगमले भारतीय आयल कर्पोरेसनबाट मूल्य घटेर आएपनि पेट्रोलमा घाटा कायमै रहेको जनाएको छ। 

निगमले आइतबार जारी गरेको विज्ञप्तिअनुसार पेट्रोलमा प्रतिलिटर १४.१९ रुपैयाँ प्रतिलिटर घाटा रहेको जनाएको हो । यस्तै डिजेलमा २१.९२ रुपैयाँ तथा ग्यासमा पनि प्रतिसिलिन्डर ५८२ रुपैयाँ ४२ पैसा घाटा रहेको निगमले जनाएको छ ।

यद्यपी हवाई इन्धनमा भने केही नाफा रहेको निगमको विज्ञप्तिमा उल्लेख छ । समग्रमा निगमलाई आगामी १५ दिनमा करिब २ अर्ब १६ कारोड घाटा हुने देखिएको निगमले जनाएको छ । 

निगमका अनुसार पेट्रोलको खरिद लागत १९५ रुपैयाँ १९ पैसा रहेको छ भने हालको बिक्रीमूल्य १८१ रुपैयाँ छ । यस्तै डिजेलको खरिद लागत १९३ रुपैयाँ ९२ पैसा हुँदा हालको बिक्रीमूल्य १७२ रुपैयाँ रहेको छ ।

यस्तै ग्यास २३८२.४२ रुपैयाँमा किनेर निगमले १८०० रुपैयाँमा बेच्दै आएको जनाएको छ ।