युनियनको अध्यक्षमा अधिकारीद्वारा उम्मेदवारी घोषणा

काठमाडाैं, असार २९ : नेपाल प्रेस युनियनको आसन्न नवौँ महाधिवेशनमा केन्द्रीय अध्यक्ष पदमा सरोज अधिकारीले उम्मेदवारी घोषणा गरेका छन्। 

युनियनको महाधिवेशन अगामी साउन ६ र ७ बागमती प्रदेश राजधानी हेटाैंडामा आयोजना हुँदैछ। उनी युनियनको कार्यसमितिको कोषाध्यक्ष छन्। आज यहाँ आयोजित कार्यक्रममा उनले विभिन्न कार्ययोजनाका साथ आफूले अध्यक्ष पदको उम्मेदवारी घोषणा गरेको जानकारी दिए।   

ती कार्ययोजनामा पत्रकारको पेसागत सुरक्षा र श्रमको मूल्य, पेशागत दक्षता, सीप, विकास र क्षमता अभिवृद्धि, मर्यादित र व्यावसायिक पत्रकारिताको प्रवद्र्धन, मिडिया मैत्री कानुन निर्माणका लागि निरन्तर पैरवी र अन्तर्राष्ट्रिय सम्बन्ध सुधार र विस्तार छन्। 

उनले भने, 'म प्रेस युनियनको अध्यक्ष पदमा उम्मेदवारी घोषणा गर्दछु। श्रमजीवी पत्रकारको साझा संस्था युनियनको गरिमालाई अझ माथि उठाउनका लागि मेरो अध्यक्ष पदमा उम्मेदवारी हो। प्रेस तथा अभिव्यक्ति स्वतन्त्रता, युनियनको निर्धारित समयमा महाधिवेशन, युनियनको सचिवालय चुस्त बनाउनेछु। पत्रकारको व्यावसायिक दक्षता बढाउनेछु।'

आफू सधैँ श्रमजीवी पत्रकारका साथमा रहेको उल्लेख गर्दै उनले यसका लागि कसैसँग सम्झौता नगर्ने स्पष्ट पार्नुभयो। उनले यसअघि नेपाली कांग्रेस ‘बिट’मा काम गरिरहेको क्रियाशील पत्रकार, विभिन्न सञ्चारमाध्यमका सम्पादक, युनियनका जिल्ला अध्यक्ष तथा केन्द्रीय पार्षदहरुसँग राय तथा सुझाव लिएका थिए। 
 
प्रेस तथा अभिव्यक्ति स्वतन्त्रता आन्दोलनमा सक्रिय उहाँ विसं २०५८ देखि विभिन्न सञ्चारमाध्यममा आबद्ध रही पत्रकारितामा क्रियाशील हुनुहुन्छ। 
–––