खुमलटारमा प्रचण्ड र गृहमन्त्रीबीच भेटवार्ता, नागरिकता विधेयकबारे छलफल 

काठमाडौं, असार २७ : गृहमन्त्री बालकृष्ण खाणले माओवादी केन्द्रका अध्यक्ष पुष्पकमल दाहाल ‘प्रचण्ड’ सँग भेटवार्ता गरेका छन् । सोमबार बिहान प्रचण्ड निवास खुमलटार पुगेर गृहमन्त्री खाणले प्रचण्डसँग भेटवार्ता गरेका हुन्। 

गृहमन्त्रालयको सचिवालयका अनुसार खुमलटार बैठकमा गृहमन्त्री खाण र प्रचण्डबीच संसदमा दर्ता भएको नागरिकता विधेयकबारे छलफल भएको थियो । छलफल सकारात्मक रहेको पनि गृहमन्त्रीको सचिवालयले जानकारी दिएको छ।  
 
सरकारले नेपाली नागरिकता ऐन, २०६३ लाई संशोधन गर्न बनेको विधेयक २०७५ साल साउन २२ गते प्रतिनिधि सभामा दर्ता गरेको थियो । शुक्रबार बसेको प्रतिनिधि सभा बैठकबाट बहुमतले उक्त विधेयक फिर्ता भएको थियो । 

विधेयक फिर्ता लिए लगत्तै शुक्रबार नै मन्त्रिपरिषद्‍ बैठकले पुन ः दर्ता गराउने निर्णय गरेको थियो। उक्त विधेयकमा सहमति जुटाउन गृहमन्त्री बालकृष्ण खाण र कानुनमन्त्री गोविन्द शर्मा कोइराला दलका शीर्ष नेताहरुसँग छलफलमा रहेका छन्।

आइतबार साँझ गृहमन्त्री खाणले प्रमुख प्रतिपक्षी दल नेकपा एमालेका संसदीय दलका उपनेता सुवासचन्द्र नेम्वाङसँग उनकै निवास बालुवाटारमा भेटघाट गरेका थिए।