पछिल्लो हप्ता मात्रै कोरोना संक्रमित ३२५ पुगे, सजगता अपनाऔँ  

काठमाडौं, असार २० : पछिल्लो साताको तथ्यांक हेर्दा हामीकहाँ कोरोना संक्रमितको संख्या बढ्दै गएको छ । असार ११ गते २७ जनामा कोराना पुष्टि भएकामा आइतबार (असार १९) मा दुई हजार एक २० जनामा परीक्षण गर्दा ५३ व्यक्तिमा कोरोना संक्रमण पुष्टि भएको छ ।   

स्वास्थ्य मन्त्रालयका अनुसार, असार १२ गते २९ जनामा, १३ गते ४१ जनामा, १४ गते ४४ जनामा, १५ गते साताकै बढी ६२ जनामा, १६ गते ५५ जनामा १७ गते ५० जना र १८ गते शनिबार ४४ जनामा कोरोना संक्रमण पुष्टि भएको थियो । यसरी हेर्दा यो हप्ता मात्रै संक्रमितको संख्या ३२५ पुगेको छ । 

स्वास्थ्य मन्त्रालयकी प्रवक्ता डा. संगीता मिश्राका अनुसार, भारत लगायत विदेशबाट नेपाल प्रवेश गर्नेलाई परीक्षण गर्दा कोभिड– १९ को पुष्टि हुने दर बढेको छ । सम्भावित जोखिम कम गर्न सबैले सतर्कता अपनाउँदै जनस्वास्थ्यका मापदण्ड पूर्णरूपमा पालना गर्न आवश्यक रहेको उनले बताइन् । 

शुक्रराज ट्रपिकल तथा सरुवा रोग अस्पतालका डा. शेरबहादुर पुनका अनुसार, अहिले संक्रमण बढ्नुलाई ओमिक्रोनको नयाँनयाँ स्वरूप अर्थात् उत्परिवर्तन भनिएको छ । ‘अहिले पहिलो लहर, दोस्रो लहरभन्दा भयावह अवस्था आएको भनेर सुनेका छैनाँै । अघिल्ला लहर हेरी यसपालि संक्रमितको संख्या केही तल–माथि हुन भने सक्छ,’ उनी भन्छन्, ‘केही व्यक्तिमा जटिल अवस्था पनि आउन सक्छ । ज्येष्ठ नागरिक र दीर्घरोगीलाई सकेसम्म संक्रमण हुन नदिने उपाय अपनाउनुपर्छ ।’ 

आत्तिनैपर्ने अवस्था नभए पनि अहिले जोखिम शून्य अवस्था होइन, त्यसैले सजगता अपनाउन आवश्यक रहेको उनको भनाइ छ । 

उनका अनुसार, कोरोनाविरुद्धको खोप नलगाएका वा खोप लगाएको लामो समय भएका व्यक्तिमा संक्रमण हुने सम्भावना बढी रहन्छ । 
चिकित्सकका अनुसार, कोरोना संक्रमण हुनबाट जोगिन भीडभाडमा नजाने, माक्सको प्रयोग गर्ने, अरु मानिसले छुने ठाउँमा छोएपछि हात धुने वा सेनिटाइजरको प्रयोग गर्ने गर्नुपर्छ ।