वाग्मती प्रदेश सरकारले प्रस्तुत गरेको बजेटमा एमालेको असहमति
हेटाैंडा, असार १० : एमाले वाग्मती प्रदेशको संसदीय दलले प्रदेश सरकारले प्रस्तुत गरेको बजेट वितरणमुखी भएको जनाएको छ।
संसदीय दलले बजेट वितरणका लागि सरकारले प्रमुख प्रतिपक्षी दल एमालेसँगको राजनीतिक सहमतिको उल्लंघन गरेकाले संसदीय रुपमा प्रतिवाद गर्ने निर्णयसमेत गरेको छ।
संसदीय दलका नेता तथा पूर्वमुख्यमन्त्री अष्टलक्ष्मी शाक्यको अध्यक्षता तथा पार्टीका स्थायी कमिटी सदस्य काशीनाथ अधिकारीको विशेष उपस्थितिमा दुई दिनसम्म बसेको बैठकले एमालेले अब संसद् बैठकमा खेल्नुपर्ने भूमिकाबारे छलफल गरेको संसदीय दलका प्रमुख सचेतक दीपक निरौलाले जानकारी दिए।
उनले बैठकमा सरकारले प्रतिपक्षले निर्वाचन जितेका स्थानीय तह तथा वडामा निकै नै कम मात्र बजेट पठाएको तथा आफ्नो दलको उपस्थिति भएको एउटै वडामा ६१ भन्दा बढी योजना राखिएको, गलत मनशाय रोखेर कर छुटको व्यवस्था गरिएको, ३५९ भन्दा बढी योजनाको डुप्लिकेसन रहेको विषयमा छलफल भएको बताए।
सरकारले बजेट वितरणलाई सामानुपातिक बनाउने विषय तथा प्रतिपक्षी दल एमालेसँग गरेको सहमतिको कार्यान्वयन नभए प्रदेशसभाको आगामी बैठक अवरुद्ध हुन सक्ने जानकारी दिए। प्रदेशसभाको आगामी बैठक यही असार १२ गतेका लागि बोलाइएको छ।
