स्कुटरले ठक्कर दिँदा पैदलयात्रीको मृत्यु

चितवन, कात्तिक २२ : भरतपुर महानगरपालिका–५ स्थित पञ्चरत्न चोकमा गएराति स्कुटरले ठक्कर दिँदा पैदलयात्रीको मृत्यु भएको छ।

मृत्यु हुनेमा अन्दाजी ४५ वर्षीय पुरुष रहेको जिल्ला प्रहरी कार्यालय चितवनले जनाएको छ। उनको सनाखत हुन सकेको छैन।

जिल्ला प्रहरी कार्यालयका अनुसार भरतपुरबाट मङ्गलपुरतर्फ जाँदै गरेको ना ३६ प ९३२४ नम्बरको स्कुटरले पैदलयात्रीलाई ठक्कर दिएको थियो। स्कुटरको ठक्करबाट घाइते पैदलयात्रीलाई उपचारका लागि चितवन मेडिकल कलेज लगिएको थियो। उनको उपचारका क्रममै मृत्यु भएको जिल्ला प्रहरी कार्यालयले जनाएको छ।

पैदलयात्रीलाई ठक्कर दिने स्कुटरका चालक गैँडाकोट नगरपालिका–१० भेडावारीका २३ वर्षीय जनक कँडेल पनि घाइते भएका छन्। उनको भरतपुर अस्पतालमा उपचार भइरहेको छ। उनको अवस्था गम्भीर रहेको अस्पतालले जनाएको छ।