बालेनलाई जातिसूचक शब्द प्रयोग गरेको भन्दै किशोर नेपालविरुद्ध उजुरी

काठमाडौं, जेठ २३ : पत्रकार किशोर नेपालविरुद्ध प्रेस काउन्सिल नेपालमा उजुरी परेको छ। काठमाडौंका नवनिर्वाचित मेयर बालेन शाहलाई जातीसूचक शब्द प्रयोग गरेको भन्दै बाराका विनय यादवले पत्रकार नेपाल र उकेरा डटकमविरुद्ध उजुरी दिएका हुन्।

यादवले गत शनिबार उकेरा डटकममा किशारे नेपालको ‘बालेन साहेबको दौडधुप’ शीर्षकको आलेखमा हिन्दु धर्मावलम्बीहरूको आराध्य देव श्री कृष्ण र सम्पुर्ण यदवंशी समाज अर्थात यादव’ समाजको अपमान गरिएको भन्दै उनीहरुलाई कारबाहीको माग राखेर काउन्सिल र महासंघमा उजुरी दर्ता गराएका हुन्।

‘पत्रकार नेपाल र उकेरालाई पत्रकारिताको न्युनतम मर्यादासमेत नराख्दै विभिन्न जातजातीलाई होच्याउने कार्य गरेकोले यथासक्य शीघ्र कारवाही गर्न आग्रह गर्दछु,’ यादवले आफ्नो उजुरीमा उल्लेख गरेका छन् । 

सोमबार दर्ता भएको उजुरीमा पत्रकार नेपाल यसअघि समेत काठमाडौंको मेयर बालेन्द्र साहलाई विभिन्न अन्तर्वार्तामा जातीसुचक शब्द प्रयोग अपमान गरेको उल्लेख गरिएको छ ।