तारा एयरको विमान खाेजी गर्न फिस्टेल एयरको हेलिकाेप्टर परिचालन 

काठमाडौं, जेठ १५ : पोखराबाट उडेको तारा एयरको ९ एनएईटी ट्विनअटर विमान बेपत्ता भएपछि खोजीकार्यका लागि हेलिकप्टर प्रयोग गरिएको छ। आइतबार बिहान सवा १० बजे पोखरा विमानस्थलबाट १९ यात्रु लिएर उडेको विमान धौलागिरी मोडिएपछि सम्पर्कविहीन भएको थियो । 

‘विमान अझैपनि सम्पर्कमा आएको छैन । हेलिकप्टर प्रयोग गरी खोजी कार्य सुरु गरिएको छ,’ मुस्ताङका प्रमुख जिल्ला अधिकारी नेत्र प्रसाद शर्माले काठमाडौं प्रेसलाई जानकारी दिएका छन् । उनले विमान दुर्घटनाग्रस्त भएको आशंका लाग्ने कुनैपनि खबर प्राप्त नभएको समेत जानकारी दिएका छन् । ‘अझैसम्म मिसिङ नै हो, दुर्घटना भएको बारे कुनै संकेत आएको छैन,’ उनले भने। 

शर्माका अनुसार बेपत्ता भएको विमान खोज्न फिस्टेल एयरको दुई हेलिकाेप्टर प्रयोग गरिएको छ । ‘खोजीका लागि एउटा विमान परिचालन भइसकेको छ, अर्को पनि परिचालन गर्ने तयारीमा छौं,’ उनले भने, ‘ नेपाल सेनाको हेलिकाेप्टर पनि परिचालन गर्दैछौं ।’

बेपत्ता भएको विमानमा चालक दलका तीन सदस्य र १९ यात्रु सवार थिए । यात्रुहरुमध्य १३ जना नेपाली र ६ जना विदेशी नागरिक रहेको बताइएको छ। 

यस्तै विमान क्याप्टेन प्रभावकर घिमिरेले उडाएका थिए भने को–पाइलट उत्सव पोखरेल र एयर होस्टेन किस्मी थापा थिइन् ।