सरकारी अधिकृत छाडेर गाउँपालिका अध्यक्ष उम्मेदवार

खोटाङ, वैशाख १६ : 'सातौं तहको सरकारी जागिरे जीवनबाट बाहिरिएर जनताको मनभित्र पस्ने प्रयास गर्दैछु,' दिप्रुङ चुइचुम्मा गाउँपालिकाको प्रमुखका उम्मेदवार गोपालचन्द्र राईले भने, 'नौ वर्ष एक महिना आठ दिन सरकारी जागिरे भएर जनताको सेवापछि जनप्रतिनिधि बनेर पुनः जनताकै सेवा गर्ने प्रण गरेको छु, मलाई पूर्ण विश्वास छ, त्यो अवसर मैले पाउनेछु।'

दिप्रुङ चुइचुम्मा गाउँपालिका–४ बतासेका बुवा केशरबहादुर र आमा कृष्णकुमारी राईको कान्छा छोरा गोपालचन्द्रले सातौँ तह (अधिकृत) को सरकारी जागिर छाडेर यही वैशाख ३० गतेको स्थानीय तहको निर्वाचनमा माओवादी केन्द्रबाट गाउँपालिका प्रमुखको उम्मेदवार बनेका छन्।

'गरिबी र अभावले जागिरे भएँ, जागिरबाट व्यक्ति मात्रै धनी, समाज भोकै हुँदा रहेछन्, समाज भोको हुँदा म एकजना व्यक्तिमात्र धनी हुन सक्दिनँ र चाहन्न पनि,” उनले भने। समाज परिवर्तन गर्ने मुख्य बाटो नै राजनीति भएकाले सरकारी जागिर छाडेर गाउँपालिका प्रमुखमा उम्मेदवारी दिएको उनले बताए। 

जागिरे जीवन सुरु गरेसँगै पेसागत संगठनमा आबद्ध राईले नेपाल आयल निगम राष्ट्रिय कर्मचारी संगठन ट्रेड युनियनको केन्द्रीय अध्यक्षसमेत सम्हालेका थिए। उनी हाल माओवादी केन्द्र उपत्यका विशेष प्रदेश सदस्य हुन्।

'समाजलाई धनी बनाउन स्थानीय स्रोतसाधन काफी छ, प्रzस्त रहेको बजेटलाई समुचित प्रयोग गरी प्रत्येक व्यक्तिलाई रोजगारी दिन सकिन्छ,' उनले भने। सीप र ज्ञानलाई विकास र उत्पादनसँग जोड्नुपर्ने उनीतर्क गर्नुहुन्छ। उनी भन्छन्, 'सम्पन्नता यही सम्भव छ, विदेश जानुपर्दैन, म यो बाटो देखाउनेछु।'

२०६९ चैत १ गते सरकारी सेवामा प्रवेश गरेर यही वैशाख ६ गते स्वेच्छिक अवकाश लिएका राईले पछिल्लो समय राजनीतिमा पैसा प्रधान हुँदै गएको बताए। 'युवाको मनोभावना र दिप्रुङ चुइचुम्मा गाउँपालिकावासीको सपना साकार पार्न मैले गाउँपालिका प्रमुखमा उम्मेदवारी दिएको हुँ, रोजगारीको वातावरण यही सम्भव छ,' उनले भने। 

‘आर्थिक समृद्धि र न्यायसहितको समानता, प्रत्येक युवालाई रोजगारी हाम्रो प्रतिबद्धता’ राईको चुनावी नारा हो। ‘एक घर, एक रोजगार’ भन्ने कार्यक्रम ल्याएर युवालाई रोजगारी दिने आफ्नो लक्ष्य सुनाउँदै राईले भने, “जसका लागि स्थानीय नीतिगत ऐनकानुन बनाउनुपर्नेछ।' शिक्षा नपुगेको ठाउँमा विद्यालय, हिलाम्मे सडक स्तरोन्नति गर्ने र पालिकामा कृषि बैंक स्थापना गर्ने उनको लक्ष्य छ।

देश र समाजका लागि सेवा गर्न राजनीतिमा आएको उनले तर्क गरे। उनले भने, 'सेवक बन्न राजनीतिमा आएको हुँ।' बजेट वितरण विभेदपूर्ण गर्दै आफ्नो क्षेत्रको विकास निर्माणलाई मात्र प्राथमिकतामा राख्ने गलत परम्परा भएको जनाउँदै उनले त्यसविरुद्ध आफ्नो उम्मेदवारी भएको बताए। 'म जाति, वर्ग, क्षेत्र र पार्टीको आधारमा विभेद गर्दिनँ, बजेट विनियोजन विभेदरहित हुनुपर्छ भन्ने मेरो मान्यता हो,' उनले भने। 

विद्यार्थी राजनीतिसँगै करिब आठ वर्ष जिल्लामा रहेर पत्रकारितासमेत गरेका राई महालेखा परीक्षकको प्रतिवेदन मात्र होइन, जनताको लेखापरीक्षणलाई पनि विश्वास गुर्नपर्ने बताउँछन्र। 'आर्थिक पारदर्शिताका सवाल जनताको घरका भित्ताभित्तामा टाँस्नेछु,' उनले प्रतिबद्धता जनाए। 

राईले शासक बनेर कार्यालयमा टक्क बस्ने र नमस्कार थाप्ने प्रवृत्तिविरुद्ध लड्नेसमेत प्रतिबद्धता जनाए। 'म नमस्कार खान होइन, घरदैलोसम्म सेवा सुविधा पुर्‍याउन आएको हुँ,' उनले भने, 'म प्रस्ट छु, जनतालाई समृद्ध बनाउन सके मेरो राजनीतिक यात्रा अघि बढ्छ, नसके टुंगिन्छ, म लामो यात्रामा निस्केको यात्री हुँ, पालिका हुँदै देशको नेतृत्व गर्ने सपना बोकेको छु। त्यसैले, जनताप्रति म प्रतिवद्ध हुनेछु।'

बतासेबाटै एसएलसी उत्तीर्ण गरेका राईले दिक्तेल बहुमुखी क्याम्सबाट स्नातक, जनप्रशासन बहुमुखी क्याम्पस बल्खु काठमाडौँबाट एमपिए, राजविराजस्थित महेन्द्र बिन्देश्वरी बहुमुखी क्याम्पसबाट एलएलबी र त्रिभुवन विश्वविद्यालयबाट राजनीतिशास्त्रमा स्नातकोत्तर उत्र्तीण गरेका छन्। २०५६ देखि ०६६ सम्म एमालेको विद्यार्थी सङ्गठन अनेरास्ववियुको विभिन्न पदमा रहेर राजनीति गरेका थिए। 

सात वडा रहेको दिप्रुङ चुइचुम्मा गाउँपालिकाको प्रमुखमा राईसहित सात जनाको उम्मेदवारी दर्ता भएको निर्वाचन अधिकृतको कार्यालयले जनाएको छ। साे गाउँपालिकामा एमालेबाट लोकेन्द्र राई, कांग्रेसबाट नइन्द्र राई, नकेपा एकीकृत समाजवादीबाट ओमीराज राई, राष्ट्रिय प्रजातन्त्र पार्टीबाट कल्पना राई, स्वतन्त्रबाट विश्वराज राई र सुरेश राईको उम्मेदवारी दर्ता भएको जनाइएको छ ।