चिनियाँ राष्ट्रपतिको भ्रमण घोषणासँगै काठमाडौंको सुरक्षामा कडाइ

काठमाडौं, असोज २२ : चिनियाँ राष्ट्रपति सी चिनफिङ नेपाल आउने भएपछि काठमाडौं उपत्यकाको सुरक्षा व्यवस्थालाई कडा बनाइएको छ। 

परराष्ट्र मन्त्रालयले एक विज्ञप्ति मार्फत सि चिनफिङ नेपाल आउने जानकारी गराएसँगै काठमाडौँ उपत्यकाको सुरक्षा व्यवस्थालाई कडा पारिएको हो। उच्च स्रोतका अनुसार उपत्यकामा कुनै संकास्पद गतिविधि वा व्यक्ति देखिएका तत्का पक्राउ गर्न तीनै सुरक्षाकर्मीलाई निर्देशन छ।

महानगरीय प्रहरी कार्यालय रानीपोखरीका प्रमुख, प्रहरी नायब महानिरीक्षक शैलेश थापा क्षेत्रीले चिनियाँ राष्ट्रपतिको सुरक्षाका लागि आवश्यक तयारी भइरहेको जानकारी दिए।  “चिनियाँ राष्ट्रपतिको भ्रमण तालिका हेरेर आवश्यक प्रहरी खटाउने व्यवस्था मिलाएका छौँ, उहाँको सुरक्षामा कुनै कमी हुन दिँदैनौँ”, उनले भने । 

प्रहरीले सी चिनफिङको सुरक्षाका लागि उपत्यका बाहिरबाट समेत थप जनशक्ति झिकाउने तयारी गरेको छ। चिनियाँ राष्ट्रपतिको सुरक्षाका लागि पहिलो घेरामा नेपाली सेना, दोस्रो घेरामा नेपाल प्रहरी, तेस्रो घेरामा सशस्त्र प्रहरी बल र चौथो घेरामा राष्ट्रिय अनुसन्धान विभागका सुरक्षाकर्मी रहने बताइएको छ ।