रोनाल्डोविनाको युभेन्ट्सले ब्रेसियालाई हरायो

काठमाडौं, असोज ८ : इटालियन सिरी ए फुटबलमा स्टार खेलाडी क्रिष्टियानो रोनाल्डोविना मैदान उत्रिएको युभेन्ट्सले ब्रेसियालाई पराजित गरेको छ। 

गएराति भएको खेलमा रोनाल्डोविना मैदान उत्रिएको युभेन्ट्सले ब्रेसियालाई २–१ गोल अन्तरले पराजित गरेको हो। 

खेलमा सुरुवाती अग्रता भने घरेलु टोली ब्रेसियाले लिएको थियो। खेलको चौथो मिनेटमा गोल अलफ्रेडो डोनारूनाले गोल गर्दै ब्रेसियालाई सुरुवाती अग्रता दिलाएका थिए।

तर, खेलको ४० औं मिनेटमा युभेन्ट्सले खेल बराबरीमा ल्याउन सफल भयो। खेल बराबरीमा ल्याउन युभेन्ट्सले ब्रेसियाका जोन चान्सलरको आत्मघाती गोल उपहार पाएको थियो।

पहिलो हाफ १–१ गोलको बराबरीमा सकिएको खेलमा दोस्रो हाफमा युभेन्ट्सले एक गोल गरेको थियो। खेलको ६३ औं मिनेटमा मिलालेम पियाचिनले गोल गर्दै युभेन्ट्सलाई २–१ को जित दिलाए।

जितसँगै पाँच खेलबाट १३ अंक जोडेको युभेन्टस लिगको शीर्ष स्थानमा उक्लिएको छ। दोस्रो स्थानमा रहेको इन्टर मिलानको ४ खेलबाट १२ अंक छ। पराजित भएको ब्रेसिया भने ५ खेलबाट ६ अंकका साथ तालिकाको १२ औं स्थानमा छ।