सर्वोच्चको आदेशले विभागमै फर्किए महानिर्देशक ढकाल

काठमाडौं, असोज ७ : सर्वोच्च अदालतको आदेशपछि औषधि व्यवस्था विभागका महानिर्देशक नारायण ढकालले पुनः जिम्मेवारी सम्हालेका छन्।

सर्वोच्च अदालतको अन्तरिम आदेश अनुसार स्वास्थ्य तथा जनसङ्ख्या मन्त्रालयले उनलाई महानिर्देशक पदको कार्यभार सम्हाल्न पत्र दिएको हो।

महानिर्देशक ढकालले भने, ‘मैले महानिर्देशक पदको जिम्मेवारी असोज ५ गते आइतबारदेखि सम्हालेको छु। म पुनः काममा फर्किएको छु।’ स्वास्थ्यसेवा तर्फको कर्मचारी समायोजनअन्तर्गत मन्त्रालयले ११औँ तहमा कार्यरत उनलाई राष्ट्रिय औषधि प्रयोगशालाको प्रमुखमा पदस्थापना गरेको थियो।

उनले मन्त्रालयको निर्णय कार्यान्वनयन रोक्न माग गर्दै सर्वोच्च अदालतमा रिट दायर गरेका थिए। साउन २१ गते रिटमाथि सुुनुवाइ हुँदा निर्णय कार्यान्वयन नगर्न नगराउन सर्वोच्चले आदेश दिएको थियो।   

मन्त्रालयले  दशौं तहका पानबहादुर क्षेत्रीलाई यसअधि निमित्त महानिर्देशकको जिम्मेवारी दिएको थियो। सर्वोच्च अदालतको अन्तरिम आदेश आएको करीब दश दिनसम्म मन्त्रालयले उनलाई जिम्मेवारीको पत्र दिन ढिलाइ गरेको थियो। (रासस)