आर्मीलाई हराउँदै मनाङ आहा रारा गोल्डकपको उपाधी नजिक 

काठमाडौं, माघ १३ : त्रिभुवन आर्मीलाई पेनाल्टी सुटआउटमा हराउँदै मनाङ मर्स्याङ्दी क्लब आहा रारा गोल्डकप फुटबलको फाइनलमा पुगेको छ । 

पोखरा रङ्गशालामा बिहीवार सम्पन्न खेलमा मनाङले आर्मीलाई पेनाल्टीमा चार–तीन गोलले हराउँदै उपाधी नजिक पुगेको हो ।

निर्धारित ९० मिनेट र अतिरिक्त ३० मिनेटमा पनि गोल हुन नसकेपछि खेल पेनाल्टीमा गएको थियो । मनाङले अहिलेसम्म ६ पटक आहा रारा गोल्डकपको उपाधि जितेको छ । 

मनाङले अब उपाधिका लागि शनिवार सशस्त्र प्रहरीको एपीएफ क्लबसँग खेल्नेछ । यसअघि हिजो बुधवार मच्छिन्द्रलाई तीन–एक गोलले हराउँदै एपीएफ फाइनलमा पुगिसकेको छ । 

प्रतियोगिताको विजेता टोलीले १० लाख एक हजार र उपविजेताले ५ लाख १ हजार रुपैयाँ पुरस्कार प्राप्त गर्नेछ ।