ग्यारेथ बेलले रियल मड्रिडलाई हारबाट जोगाए

काठमाडौं, भदौ १६ : स्पेनिस ला लिगा फुटबलमा रियल मड्रिड भिल्लारियलसँग बराबरीमा रोकिएको छ। 

गएराति भएको खेलमा रियल मड्रिड भिल्लारियलसँग २–२ गोलको बराबरीमा रोकिएको हो। रियल मड्रिडका लागि दुबै गोल ग्यारेथ बेलले गरेका थिए।

खेलको १२ औं मिनेटमा जेरार्ड मोरेनोले गोल गर्दै भिल्लारियललाई सुरुवाती अग्रता दिलाएका थिए। खेलको ४५ औं मिनेटमा रियल मड्रिडका ग्यारेथले गोल गर्दै खेल १–१ को बराबरीमा ल्याएका थिए। 

पहिलो हाफ १–१ गोलको बराबरीमा सकिएको खेलको दोस्रो हाफमा दुबै टोलीले १–१ गोल गरेका थिए। खेलको ७४ औं मिनेटमा गोमेजले गोल गर्दै भिल्लारियललाई फेरि अग्रता दिलाएका थिए। तर, खेलको ८६ औं मिनेटमा रियल मड्रिका लागि ग्यारेथले गोल फर्काएका थिए। 

दुई गोल गर्दै रियललाई हारबाट जोगाएका बेल इन्जुरी समयमा रातो कार्ड खाँदै मैदानबाट बाहिरिएका थिए।

बराबरीपछि रियल मड्रिड ३ खेलबाट ५ अंकका साथ तालिकाको पाँचौ स्थानमा उक्लिएको छ।