नवनिर्वाचित कांग्रेस सभापति देउवासहित अन्य पदाधिकारी एवं केन्द्रीय सदस्यहरुले लिए प्रमाणपत्र

काठमाडौं, पुस १० : नेपाली कांग्रेसको १४औं महाधिवेशनबाट निर्वाचित सभापति, पदाधिकारी एवं केन्द्रीय सदस्यहरुले निर्वाचित भएको प्रमाणपत्र ग्रहण गरेका छन्।

केन्द्रीय निर्वाचन समितिका संयोजक गोपालकृष्ण घिमिरेले सभापति शेरबहादुर देउवा, उपसभापतिद्वय पूर्णबहादुर खड्का र धनराज गुरुङ, महामन्त्रीद्वय गगन थापा र विश्वप्रकाश शर्मा लगायत पदाधिकारी र केन्द्रीय सदस्यहरुलाई प्रमाणपत्र हस्तान्तरण गरेका हुन्।

प्रमाणपत्र वितरणका लागि कांग्रेस केन्द्रीय कार्यालय सानेपामा आज (शनिबार) एक कार्यक्रम आयोजना गरिएको थियो। निर्वाचन समितिका सदस्यहरुले नवनिर्वाचित पदाधिकारी एवं सदस्यहरुलाई खादा र माला लगाइदिएका थिए।

गत मंसिर २४ देखि २८ गतेसम्म काठमाडौंमा सम्पन्न महाधिवेशनअन्तर्गत नयाँ नेतृत्वका लागि भएको निर्वाचनको मतगणना बिहीबार सकिएको थियो।