ला लिगामा एथ्लेटिको मड्रिडको पुनरागमन जित

काठमाडौं, भदौ १६ : दुई सुन्यले पछि परेको स्थिति उल्टाउँदै ला लिगा फुटबलमा एट्लेटिको मड्रिडले जित हात पारेको छ।

घरेलु मैदानमा भएको खेलमा एथ्लेटिको मड्रिड १९ मिनेटमै २–० ले पछि परेको थियो। तर, २–० ले पछि परेको स्थिति उल्टाउँदै एथ्लेटिको मड्रिडले इबरलाई ३–२ गोल अन्तरले पराजित गर्न सफल भयो।

खेलको ७ औं मिनेटमै इबरका लागि चार्लिसले गोल गर्दै सुरुवाती अग्रता दिलाएका थिए। खेलको १९ औं मिनेटमा अनाइटिज आर्बिलाले गोल गर्दै इबरको अग्रता दोब्बर पारेका थिए।

खेलको २७ औं मिनेटमा एथ्लेटिको मड्रिडका लागि जोआओ फिलिक्सले गोल गर्दै अग्रता २–१ मा झारे।

पहिलो हाफमा २–१ ले पछि परेको एथ्लेटिको मड्रिडले दोस्रो हाफमा थप दुई गोल गर्न सफल भयो। खेलको ५२ औं मिनेटमा भिटोलोले गोल गर्दै खेल २–२ को बराबरीमा ल्याएका थिए। 

यस्तै, खेलको ९० औं मिनेटमा थोमस पार्टेले गोल गरेपछि एथ्लेटिको मड्रिड ३–२ को जित निकाल्न सफल भयो। 

एथ्लेटिको मड्रिड ३ खेलबाट ९ अंक जोड्दै अंक तालिकाको शीर्ष स्थानमा उक्लिएको छ।