सिराहामा छुरा प्रहार प्रकरणमा संलग्न रहेकाे आरोपमा पाँच जना पक्राउ 

काठमाडौं, पुस ७ : सिराहाको गोलबजार नगरपालिका–६ डोहटियाका २६ वर्षीय रामकुमार सुदाको हत्या भएको घटनामा संलग्न रहेको आरोपमा ५ जना पक्राउ परेका छन्। 

पक्राउ पर्नेहरुमा  २२ बर्षका भुवनप्रसाद महतो, १९ बर्षका श्रवणकुमार मण्डल, २० बर्षका कालु भन्ने रोहन विश्वकर्मा, १८ बर्षका सौकात खान र १९ बर्षका धर्मेन्द्र यादव रहेका छन्। 

पक्राउ परेका पाँचै जनाविरुद्ध अनुसन्धानका लागि जिल्ला अदालत सिराहाबाट अनुमति लिइएको प्रहरीले जनाएको छ। 

गोलबजारको लक्ष्मी मन्दिरदेखि पश्चिमतर्फ बाटोमा होहल्ला गरेको भन्दै रामकुमार सदाको समूह र दीपक साहको समूहबीच विवाद भएको थियो । 

सोही विवादमा झगडा हुँदा दीपक शाहको समूहले रामकुमार सदामाथि छुरा प्रहार गरेको प्रारम्भिक अनुसन्धानबाट खुलेको सिरहाका प्रहरी प्रवक्ता डीएसपी सुवास बुढाथोकीले जानकारी दिए । घटनामा सोही ठाउँका २६ बर्षका रिकेश सदा घाइते भएका थिए ।

प्रदेश प्रहरी कार्यालय जनकपुर, जिल्ला प्रहरी कार्यालय सिरहा र इलाका प्रहरी कार्यालय गोलबजारको टोलीले उनीहरुलाई पक्राउ गरेको हो । उनीहरुमाथि अनुसन्धानका लागि हिरासतमा राख्न जिल्ला अदालतबाट अनुमति लिएको प्रहरीले बताएको छ ।