काउटिन्होले भने–वार्यनमा लामो समय बस्न र धेरै उपाधि जित्न चाहन्छु

काठमाडौं, भदौ ३ :लोनमा जर्मन क्लब वार्यन म्युनिखमा आबद्ध भएका ब्राजिलियन मिडफिल्डर फिलिप काउटिन्होले क्लबमा आफू लामो समयसम्म बस्न र धेरै उपाधि जित्न चाहेको बताएका छन्। 

बार्सिलोनाबाट एक वर्षका लागि लोनमा वार्यन म्युनिखमा आबद्ध भएका काउटिन्होले स्पेन बसाइ सोचेजस्तो नभएको पनि बताएका छन्। ‘बार्सिलोनामा सोचेजस्तो भएन। अब वार्यनमा लामो समय बसेर धेरै उपाधि जित्ने चाहना छ,’ उनले भने। उनले वार्यनजस्तो ठूलो क्लबमा आउन पाउँदा आफूलाई खुशी लागेको बताए। 

वार्यनले २७ वर्षीय मिडफिल्डर कौटिन्होलाई यसअघि आर्जेन रोबिनले लगाउँदै आएको १० नम्बर जर्सी दिएको छ। ‘प्रशिक्षकले मलाई कहाँ खेलाउने भन्ने निर्णय लिनेछन्। तर, मलाई मन पर्ने पोजिसन भनेको १० नम्बर नै हो,’ काउटिन्होले भने।

काउटिन्होलाई वार्यनले ८.५ मिलियन युरोमा अनुबन्ध गरेको हो। बार्सिलोनाले काउटिन्होलाई १२० मिलियन युरोमा किन्नका लागि अवसर समेत वार्यनलाई दिएको छ।