धारिलो हतियार प्रहार गरी हत्या गरेको अभियोगमा ८ जना पक्राउ

कैलाली, कात्तिक २४ : टिकापुर नगरपालिका १ स्थित सिद्वार्थ होटल नजिकै २३ वर्षीय भुपेन्द्र बडुवालको धारिलो हतियार प्रहार गरी हत्या भएको छ। हत्याको अभियोगमा प्रहरीले मंगलबार ८ जनालाई प्रहरीले पक्राउ गरी अनुसन्धान सुरू गरेको छ।

पक्राउ पर्नेहरूमा लम्कीचुहा नगरपालिका ३ चिसापानीका २४ वर्षीय महेश रावल, २० वर्षीय आर्यन देवकोटा, २० वर्षीय धिरज शाही, २२ वर्षीय कपिल श्रेष्ठ तथा १८ वर्षीय किशोर, २३ वर्षीय प्रबीन रिमाल, २१ वर्षीय रोहित आले र २६ वर्षीय सोहन शाह रहेका छन्।

अपरिचित ब्यक्तिहरुको धारिलो हतियार प्रहारबाट भुपेन्द्र गम्भीर घाइते भएको भन्ने खबर प्राप्त हुनासाथ जिल्ला प्रहरी कार्यालय कैलाली र इलाका प्रहरी कार्यालय टिकापुरबाट प्रहरी टोली परिचालन गरी तत्काल घाइतेलाई उपचारको लागि टिकापुर अस्पताल लगेकोमा उपचारको क्रममा उनको मृत्यु भएको थियो। घटनास्थलबाट सु.प.प्र.०१००८ प ५५६५ नम्बरको स्कुटर र सु.प.प्र.०१००८ प १०७२ नम्बरको मोटरसाइकल प्रहरीले नियन्त्रणमा लिएको छ।

सोही बिषयलाई लिएर मृतकका आफन्तहरुले चिसापानी बजारस्थित महेश रावलको संगम होटल, भैरव शाही र राज बहादुर शाहीको घरमा ढुंगामुडा गर्दा सामान्य क्षति भएको छ। साथै उनीहरुले लम्कीचुहा नगरपालिका १ स्थित लम्की चोकमा पूर्व पश्चिम राजमार्ग समेत अवरोध गरेकोले हटाउने पहल भइरहेको छ।

घटनामा संलग्न अन्यको खोजी गर्नुको साथै यस सम्बन्धमा थप अनुसन्धान भइरहेको जिल्ला प्रहरी कार्यालय कैलालीले जनाएको छ।