बोक्सीको आरोपमा मलमूत्र खुवाउने चारजना कारागारमा

जलेश्वर, कात्तिक २२ : महोत्तरी जिल्लाको जलेश्वर नगरपालिका–४ सुगा गाउँमा बोक्सीको आरोपमा एक महिलालाई मानव मलमूत्र खुवाएको आरोपमा दुई महिलासहित चार जनालाई महोत्तरी जिल्ला अदालतले पुर्पक्षका लागि कारागारमा राख्ने आदेश दिएको छ।

अदालतका स्रेस्तेदार मदनप्रसाद जयसवालका अनुसार स्थानीय सिकिन्दर महतोकी पत्नी पुरनीदेवीे, रगेश्वर महतोकी पत्नी प्रमिलादेवी, रगेश्वर महतोकै जेठो छोरा सिकिन्दर र कान्छो छोरा अनिललाई पूर्पक्षका लागि जलेश्वर कारागारमा पठाइएको हो।

बडादसैँको सप्तमीका दिन बिहान ३ बजे स्थानीय शम्भु महतोकी पत्नी ४२ वर्षीया सुकमरियादेवी टोलमा घुमिरहेको अवस्थामा सिकिन्दर महतोको घर अगाडि पुग्दा निजकी छोरी १३ वर्षीया काजल उनलाई देखेर रुन थालेपछि सिकिन्दरसहित परिवारका चारै जनाले सुकमरियाले नै जादु र टुनामुना लगाएको भन्दै उनलाई समातेर मलमूत्र खुवाउनुका साथै अपमानजनक व्यवहार गरेका थिए।

सुकमरियालाई घरअगाडिको बिजुलीको पोलमा बाँधेर कपाल काट्ने, शरीरको कपडा फुकालेर नाङ्गो बनाउने, टाउको र अनुहारमा कालो र सेतो दलेर मानव मलमूत्र खुवाउने गिरएकाे थियाे।  सो घटनामा प्रहरीले कात्तिक १ गते अभियुक्तहरूलाई पक्राउ गरेको थियो।