बेवारिसे गाईबाच्छाका लागि देउसी भैलोबाट एक लाख ७५ हजार संकलन

काठमाडौं, कात्तिक २१ : कागेश्वरी मनोहरा नगरपालिका–८ स्थित पशुपति क्षेत्र विकास कोषले उपलब्ध गराएको जग्गामा संरक्षण गरिएका गाईबाच्छाको सहयोगका लागि एक लाख ७५ हजार रुपैयाँ सहयोग जुटेको छ ।

तिहारका अवसरमा देउसी भैलो खेली सहयोग जुटाइएको बेवारिसे गाईबाच्छा संरक्षण अभियानकर्मी ईश्वर पुडासैनीले बताए । गाईबाच्छा संरक्षणस्थलमै भएको देउसी भैलो कार्यक्रममा दुई सय जनाभन्दा बढीको सहभागिता थियो । 

गोकर्णेश्वर नगरपालिकाकी उपप्रमुख शान्ति नेपाल, काठमाडौं महानगरपालिका–६ का वडाध्यक्ष दीपेन्द्र लामा, गोकर्णेश्वर नगरपालिका–७ का वडाध्यक्ष केशव गुरुङ र गोकर्णेश्वर–८ का वडाध्यक्ष मनोज ढुंगाना, कागेश्वरी मनोहरा नगरपालिका–८ का वडाध्यक्ष श्रीप्रसाद चापागाईंलगायत स्थानीय तहका जनप्रतिनिधि पनि देउसी भैलोमा सहभागी थिए ।

विभिन्न कारणले सडकमा छोडिएका १०० भन्दा बढी गाईबाच्छालाई अभियानकर्मीले संरक्षण गर्दै आएका छन् । संरक्षणस्थलमा गाईको संख्या थपघट भइरहन्छ । २ जेठ ०७५ देखि त्रिभुवन अन्तर्राष्ट्रिय विमानस्थलको उत्तरी भागस्थित वागमती किनारमा गाईबाच्छा संंरक्षण गरिएको थियो ।
 
कोरोना महामारीका कारण ११ चैत ०७६ मा देशव्यापी लकडाउन गरिएका बेला सडकमा गाईबाच्छा बढ्न थालेकाले कोषले गौशाला बनाउन जग्गा उपलब्ध गराएको थियो । यहाँ २ जुठ ०७७ देखि गाईबाच्छा संरक्षण सुरु गरिएको अभियानकर्मी उत्तम पुडासैनीले जानकारी दिए । देउसी, भैलो, जन्मदिनलगायत दाताले दिने सहयोगबाट एक सयभन्दा बढी गाईबाच्छाको संरक्षण हुँदै आएको छ । रासस