१५ वर्षपछि सकियो धर्मशाला निर्माण

वीरगञ्ज, कात्तिक २० : बाराको परवानीपुर गाउँपालिका–५ बहुअरीमा निर्माण थालिएको १५ वर्षपछि बल्ल विष्णुनारायण धर्मशालाको निर्माण पूरा भएको छ ।

२०६३ सालमा शिलान्यास गरिएको धर्मशाला बनाउन १५ वर्ष लाग्यो । यसका लागि ५९ लाख रुपैयाँ खर्च भएको निर्माण समितिका अध्यक्ष सुरेशप्रसाद कुर्मीले जानकारी दिए ।

गाउँपालिकाले २० लाख, प्रदेश सरकारले ३० लाख, साविकको जिल्ला विकास समितिले ६ लाख ५० हजार रुपैयाँका साथै विभिन्न व्यक्ति तथा संघसंस्थाको आर्थिक सहयोगमा धर्मशाला निर्माण गरिएकोे हो ।

७४ फिट लम्बाइ र ५६ फिट चौडाइको धर्मशालामा बैठक कक्ष र सातवटा कोठा छन् । विवाह, पाटी, व्रतबन्धलगायत सामाजिक कार्यमा यसलाई प्रयोगमा ल्याइने भएको छ ।

धर्मशालाको शौचालय भने तयार भइसकेको छैन । सेफ्टीट्यांकीको काम सम्पन्न भइसकेको छ । माथिको संरचना तयार गर्न रकम अभाव छ । धर्मशाला पछाडिको खाली जमिनमा भान्छाघर बनाउने योजना रहेको कुर्मीले बताए ।