टिपरको ठक्करबाट पैदलयात्रीको मृत्यु

रुपन्देही, कात्तिक १६ : तिलोत्तमा नगरपालिका–३ सीता राइस मिलस्थित सडकमा लु२ख ३३१६ नम्बरको टिपरको ठक्करबाट सोही ठाउँ बस्ने ६८ वर्षीया प्रेमकुमारी आचार्यको मंगलबार बिहान मृत्यु भएको छ ।

ठक्करबाट गम्भीर घाइते भएकी उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । फरार रहेका टिपर चालकको खोजी भइरहको प्रहरीले जनाएको छ ।

यस्तै, सुनसरी कोशी गाउँपालिका–३ पश्चिम कुसाहा बस्ने मेहरमान मियाका छोरा १० वर्षीय सोएल मंसुरीको आफ्नै घरको छतबाट लडेर मंगलबार बिहान मृत्यु भएको छ । खेलिरहेको अवस्थामा लडेर गम्भीर घाइते भएका उनको जिल्ला अस्पताल इनरुवामा उपचारको क्रममा मृत्यु भएको हो ।

सुनसरीकै धरान उपमहानगरपालिका–१७ बिजुवामार्गकी १९ वर्षीया प्रमिला विक आफ्नै कोठामा सुतिरहेको अवस्थामा मंगलबार मृत फेला परेकी छन् ।