राप्रपाको महाधिवेशन पनि दुई साता पछि सर्‍यो

काठमाडौं, कात्तिक १२ : राष्ट्रिय प्रजातन्त्र पार्टी (राप्रपा) को केन्द्रीय विशेष समितिको बैठकले पार्टीको केन्द्रीय महाधिवेशन आगामी मंसिर ११ देखि १३ गतेसम्म काठमाडौंमा गर्ने निर्णय गरेको छ।

बैठकले यही कात्तिक २७ देखि ३० गतेसम्म गर्ने भनिएको सो अधिवेशन प्राविधिक कारणले केही साता सार्ने निर्णय गरेको हो। पार्टीका केन्द्रीय सदस्य सुन्दर पाण्डेले बैठकले सक्रिय सदस्य बनाउने अवधि कात्तिक १५ गतेसम्म बढाउने निर्णय गरेको जानकारी दिए। बैठकले केन्द्रीय निर्वाचन समितिलाई कात्तिक २६ गतेभित्र सक्रिय सदस्यको नामावली जिल्लामा पठाउने निर्देशन दिएको छ।

सक्रिय सदस्यको दाबी विरोध यही कात्तिक २७ देखि २९ गते गर्ने, अन्तिम नामावली ३० गते प्रकाशन गर्न निर्वाचन समितिलाई जिम्मेवारी दिएको बैठकले सक्रिय सदस्यको नामावली पार्टीको वेबसाइट तथा जिल्ला पार्टी कार्यालयमा राखी सार्वजनिक गर्न, जिल्ला अधिवेशन कात्तिक २३ गतेभित्र सम्पन्न गर्न, सातवटै प्रदेशसभाबाट प्रदेश कार्यसमितिको निर्वाचन कात्तिक २८ गते गर्ने निर्देशन दिएको छ।

सक्रिय सदस्यबाट महाधिवेशन प्रतिनिधिको निर्वाचन आगामी मंसिर १ देखि ३ गते गर्ने, जिल्ला कार्यसमितिसँग समन्वय गरी प्रदेशसभा निर्वाचन क्षेत्रीय कार्यसमितिले निर्वाचनका लागि आवश्यक व्यवस्थापन गर्ने कार्यसूची तय गरेको छ।

महाधिवेशनको तयारीका लागि विभिन्न नौ समिति गठन गरेको बैठकले सामाजिक कार्यपत्र तयारी समितिको संयोजकमा पशुपतिशम्शेर जबरालाई जिम्मेवारी तोकेको छ।

आर्थिक कार्यपत्र तयारी समितिको संयोजकमा डा. प्रकाशचन्द्र लोहनी, राजनीतिक कार्यपत्र तयारी समितिको संयोजकमा कमल थापा रहेका छन्। बैठकले कार्यक्रम तथा व्यवस्थापन समिति, भोजन व्यवस्था समिति, स्वास्थ्य समिति, प्रचारप्रसार समिति, स्वागत समिति र स्वयंसेवक परिचालन समिति गठन गरेको छ।