चितवन राष्ट्रिय निकुञ्जमा मृत भेटियो गैंडा

चितवन, असोज १२ : चितवन राष्ट्रिय निकुञ्जअन्तर्गत माडी क्षेत्रको रेवाखोला किनारमा गैँडा मृत फेला परेको छ।

सोमबार मध्याह्न १२ बजे निकुञ्जको धोवा पोष्टबाट साढे एक किलोमिटर दक्षिणपूर्व कोर इलाकाको घाँसे मैदान रहेको रेवाखोला किनारमा अन्दाजी १० वर्षको पोथी गैँडा मृत फेला परेको निकुञ्जले जनाएको छ।

निकुञ्जका प्रमुख संरक्षण अधिकृत अणनाथ बरालले फलामको रड घोपिएको अवस्थामा उक्त गैँडा मृत फेला परेको बताए। धानबाली खानेक्रममा स्थानीयवासीले रड घोपेर मरेको अनुमान गरिएको उनको भनाइ छ।

यस विषयमा थप अनुसन्धान भइरहेको निकुञ्जले जनाएको छ। गैँडाको कोखमा रड घोपिएको कारण भित्री चोट लागी आइतबार राति मरेको भए पनि सोमबार मृत भेटिएको बरालले बताए।

'हामीले ट्रयापिङ गर्दा जिउंँदै थियो, मध्याह्नतिर झाडीमा मृत फेला पर्‍यो,' उनले भने। गैँडा मृत फेला परे पनि गैँडाको खाग र खुर भने सुरक्षित रहेको बरालको भनाइ छ।

यो वर्ष विभिन्न कारणले आठवटा गैँडा मरिसकेका छन्। राष्ट्रिय गैँडा गणना विसं २०७७ अनुसार चितवन राष्ट्रिय निकुञ्जमा ६९४ वटा गैँडा रहेका छन्। (रासस)