एनसेलले फोरजी सुविधाका साथ ईपीएल प्रत्यक्ष प्रसारण गर्ने

काठमाडौं, असोज ८ : क्रिकेट पारखीले ईपीएल अब एनसेल फोरजीका साथ अनलाइनबाट प्रत्यक्ष हेर्न सक्ने भएका छन्। शनिबारदेखि सुरु हुने ‘बजाज पल्सर एभरेस्ट प्रिमियर लिग’को प्रत्यक्ष प्रसारण हेर्ने ग्राहकसँग जोडिने र उनीहरूका अनुभव आदानप्रदान गर्न ईपीएल–एनसेल सहकार्यले सकारात्मक भूमिका खेल्ने विश्वास एनसेलको छ।

एनसेलका अनुसार नव प्रतिभाहरूको प्रबर्द्धनका लागि खेलकुदमा लगानी गर्नुपर्छ भन्ने विश्वास एनसेलको छ र ईपीएलजस्तो खेलले ग्राहकहरूसँग प्रत्यक्ष रूपमा जोडिने अवसर प्रदान गर्नेछ । यो नयाँ संस्करणको ईपीएलमा एनसेल ‘कनेक्टेड बाइ’ पार्टनरको रूपमा आबद्ध भएको छ र यसले देशमा क्रिकेटको विकासका लागि योगदान गर्ने विश्वास एनसेलले लिएको छ।

आफ्नो सबैभन्दा ठूलो फोरजी सञ्जालका साथ एनसेलले ईपीएलमार्फत मानिसहरू माझ आउटडोर खेलप्रतिको लगावलाई पुनःस्थापित गर्न मद्दत गर्ने कम्पनीको भनाइ छ ।

सन् २०१६ देखि सुरु भएको यो यात्रा अहिले विश्वको ठूलो क्रिकेट लिगमध्ये एक भएको छ। यो खेल विश्वका १५५ देशमा प्रसारण गर्ने तयारी छ र ४५ करोड जनसंख्या यो कार्यक्रमको पहुँचमा हुनेछ। ईपीएलअन्तर्गत सन् २०१७ र २०१८ मा अन्तर्राष्ट्रिय खेलाडीहरू पहिलोपटक नेपालमा क्रिकेट खेल्न आएका थिए, जुन निकै सफल भएको थियो।

छोटो समयमै गति लिन सफल ईपीएलले विश्वव्यापी रूपमा ध्यान खिच्न सफल भएको छ र नेपालका लागि यो सच्चा राजदूतको रूपमा स्थापित भएको छ। पाकिस्तानी क्रिकेट ‘लिजेन्ड’ साहिद अफ्रिदी यस वर्ष ईपीएल खेल्न नेपाल आएका छन् । ‘नेपालको जस्तो प्राकृतिक सौन्दर्य अरू कतै नरहेको सुनेको छु र ईपीएलको नयाँ संस्करण नेपालमा खेल्न म निकै उत्साहित छु,’ अफ्रिदीले भनेका छन् ।