व्यक्ति नभई विचार र नेता नभई नीतिको पछि लाग्न राप्रपा अध्यक्ष थापाको आग्रह
भक्तपुर, भदौ २८ : राष्ट्रिय प्रजातन्त्र पार्टी (राप्रपा) का अध्यक्ष कमल थापाले पार्टीका नेता तथा कार्यकर्ताहरूलाई व्यक्ति नभई विचार र नेता नभई नीतिको पछि लाग्न आग्रह गरेका छन्।
राप्रपा जिल्ला कार्यसमिति भक्तपुरद्वारा आज (सोमबार) आयोजित एक कार्यक्रममा बोल्दै अध्यक्ष थापाले राप्रपा कम्युनिस्ट र कांग्रेसभन्दा फरक विचारधारा बनाएर अघि बढिरहेको दाबी गरे।
उनले राप्रपालाई कहिल्यै नफुटाउने र फुट्न नदिने अठोट पनि गरे। उनले पार्टीको केन्द्रीय महाधिवेशन आगामी कात्तिक २७ गतेदिख काठमाडौंमा पार्टीको नयाँ विधानअनुसार गरिने जानकारी पनि दिए।
अध्यक्ष थापाले देशभरिका गाउँपालिका र नगरपालिकाका पार्टी अध्यक्षहरू महाधिवेशन प्रतिनिधि हुने जानकारी दिए। ‘प्रत्येक प्रदेश निर्वाचन क्षेत्रबाट कम्तीमा ९ जनाको दरले सक्रिय सदस्य महाधिवेशन प्रतिनिधि छनोट भएर आउने उनको भनाइ थियो।
पहिलेला जस्तो जिल्ला कार्यसमिति, क्षेत्रीय कार्यसमितिले खल्तीबाट झिकेर महाधिवेशन प्रतिनिधि पठाउन सक्ने व्यवस्था अब नभएको उनले स्पष्ट पारे।
