लमजुङमा चार मेगावाट बिजुली थपिँदै

लमजुङ, भदौ २८ : जिल्लामा आगामी असोज पहिलो सातादेखि चार मेगावाट बिजुली थपिने भएको छ। दोर्दी गाउँपालिका–७ र ८ को सिमानामा माथिल्लो छ्यांदीखोला साना जलविद्युत् आयोजना निर्माण सम्पन्न भएपछि सो परिमाणको बिजुली थपिने भएको हो।

उत्पादन परीक्षण भइसकेकाले असोज पहिलो सातादेखि बिजुली राष्ट्रिय प्रशारण लाइनमा जोडिने आयोजनाका प्रमुख कार्यकारी अधिकृत एलबी थापाले जानकारी दिए। उनले भने, ‘असोज पहिलो सातादेखि नै बिजुली उत्पादन हुन्छ।’ विसं २०७७ साउनमा सम्पन्न गर्ने लक्ष्यका साथ आयोजनाको काम थालिएको थियो। कोरोना सङ्क्रमणका कारण आयोजना एक वर्ष ढिला सकिएको हो। 

रु ८० करोड ३५ लाखको लागतमा बिजुली उत्पादन भएको प्रबद्र्धक कम्पनी छ्यांदी हाइड्रोपावरले जनाएको छ। सो आयोजनामा बैंक अफ काठमाडौं र कुमारी बैंकको ७५ प्रतिशत ऋण रहेको छ। आयोजनाको बाँधस्थलबाट सर्जट्याङसम्म दुई हजार ८७४ मिटर हेडरेस र सर्जट्याङबाट एक हजार ३५६ मिटर पेनस्टक पाइपबाट विद्युत् गृहमा पानी फालिएको छ। यहाँबाट उत्पादित बिजुली उदिपुर सवस्टेशनमा जोडिने छ।  

आयोजनाले २०७४ असार २२ गते नेपाल विद्युत् प्राधिकरणसँग पिपिए सम्झौता गरेको थियो। सो सम्झौता अनुसार बर्खायाममा प्रतियुनिट मूल्य चार रुपैयाँ ८० पैसा र हिउँदमा प्रतियुनिट आठ रुपैयाँ ४० पैसा तोकिएको छ।