एमालेमै बस्ने निर्णय गर्दै सुदूरपश्चिमका दुई मन्त्रीले दिए पदबाट राजीनामा
पार्टी विभाजनमा एमालेमै बस्ने निर्णय गर्दै सुदूरपश्चिम प्रदेश सरकारका दुई मन्त्रीले पदबाट राजीनामा दिएका छन्।
काठमाडौं, भदौ २२ : पार्टी विभाजनमा एमालेमै बस्ने निर्णय गर्दै सुदूरपश्चिम प्रदेश सरकारका दुई मन्त्रीले पदबाट राजीनामा दिएका छन् ।
राजीनामा दिनेमा आर्थिक मामिला तथा योजना मन्त्री प्रकाशबहादुर शाह र सोही मन्त्रालयकी राज्यमन्त्री अर्चना गहतराज छन् । उनीहरूले मुख्यमन्त्री त्रिलोचन भट्टलाई राजीनामा बुझाएका हुन् ।
शाहले प्रदेश सरकारमा सुरुदेखि नै एमालेको नेतृत्व गर्दै आएका थिए । सुरुमा उनी आन्तरिक मामिला मन्त्री थिए । पछि आर्थिक मामिला तथा योजना मन्त्री बनेका थिए । राज्यमन्त्री गहतराज गत जेठमा नियुक्त भएकी थिइन् ।
एमालेमै बस्ने निर्णय गर्दै उनीहरूले पदबाट राजीनामा दिएको बताएका छन् । प्रदेश सरकारमा माओवादी केन्द्र र नेकपा (एकीकृत समाजवादी)का सांसदबाटै बहुमत पुग्ने अवस्था छ । तथापि, शाह र गहतराज दुवै एमालेमा माधवकुमार नेपाल–झलनाथ खनाल पक्षमा थिए ।
५२ सदस्यीय प्रदेशसभामा माओवादी केन्द्रका १३ र एकीकृत समाजवादीका १४ सांसद छन् । सरकारलाई बहुमतका लागि २७ सांसद आवश्यक हुन्छन् । उक्त प्रदेशसभामा कांग्रेसका १२ सांसद छन् ।
