सुदूरपश्चिम प्रदेशसभामा नेकपा (एकीकृत समाजवादी) सबैभन्दा ठूलो दल

काठमाडौं, भदौ २१ : सुदूरपश्चिम प्रदेशसभामा नेकपा (एकीकृत समाजवादी) सबैभन्दा ठूलो दल बनेको छ ।

१४ जना प्रदेशसभा सदस्यले एमाले छाडेर एकीकृत समाजवादी रोजेपछि उक्त पार्टी सबैभन्दा ठूलो बनेको हो ।

यसअघि ५२ सदस्यीय प्रदेशसभामा एमालेका सभामुखसहित २५ सांसद थिए । तीमध्ये १४ जनाले एकीकृत समाजवादी रोजेका हुन् । अब एमालेसँग ११ सांसद मात्र बाँकी भएका छन् ।

सोमबार मात्र एमाले सांसद माया तामाङ बोहराले एमाले छाडेर एकीकृत समाजवादी रोजेकी छन् । यसअघि दीर्घ सोडारी, तारा लामा तामाङ, बलबहादुर सोडारी, पूर्णा जोशी, दुर्गा कामी, माया भट्ट, लालबहादुर खड्का, अमरबहादुर साउद, अर्चना गहतराज, चुनकुमारी चौधरी, मना साउद, कुलवीर चौधरी र सुशीला बुढाथोकीले एकीकृत समाजवादी रोजेका थिए ।

सुदूरपश्चिम प्रदेशसभामा माओवादी केन्द्रका १३, कांग्रेसका १२ र जसपाका दुई सांसद छन् । यसअघि प्रदेशसभाको सबैभन्दा ठूलो दल रहेको एमाले ११ सांसदसहित चौथो दल बनेको छ ।