पहिरोमा परेर पोखरामा तीन जनाको मृत्यु, एक बेपत्ता

पोखरा, भदौ १७ : अविरल वर्षाका कारण पहिराेमा परेर पोखरामा तीन जनाको मृत्यु भएको छ। पहिराेमा एक बालक बेपत्ता हुनाका साथै चार जना घाइते भएका छन्।

लगातारको वर्षापछि गए राति आएको पहिराेले घर पुरिँदा पोखरा महानगरपालिका–२० भलाममा दुई जनाको मृत्यु भएको छ। मृत्यु हुनेमा घरधनी ४५ वर्षका कृष्ण श्रेष्ठ र उनकी श्रीमती ३५ वर्षीया सुनमाया तामाङ रहेका छन्। पहिरामा परी उनका तीन वर्षीय छोरा सन्तोष बेपत्ता छन् भने घाइते आठ वर्षीय राजकुमारको मणिपाल अस्पतालमा उपचार भइरहेको जिल्ला प्रहरी कार्यालय कास्कीका प्रवक्ता सुभास हमालले जानकारी दिए।

त्यसैगरि पोखरा–११ भञ्ज्याङ नमूना टोलमा पहिराेले घर परिँदा घाइते ४२ वर्षीय लक्ष्य नेपालीको उपचारका क्रममा मणिपाल शिक्षण अस्पतालमा मृत्यु भएको प्रहरीले जनाएको छ। पहिराेमा परी घाइते भएका दुई जनाको उक्त अस्पतालमा उपचार भइरहेको छ। प्रहरीका अनुसार पोखरा–११ काँहुमा पहिराले घर पुरिँदा एकैघरका तीन जना घाइते भएका छन्। 

अहिले घटनास्थलमा स्थानीय बासिन्दा, प्रहरी र विभिन्न सङ्घ संस्थाको सहयोगमा उद्धार कार्य भइरहेको छ।