छिट्टै नयाँ पार्टी घोषणा गर्दै हृदयेश त्रिपाठी

काठमाडौं, भदौ १० : राजनीतिक दलसम्बन्धी अध्यादेश आएर दुईवटा पार्टी निर्वाचनमा आयोगमा दर्ता भइसकेको सन्दर्भमा पूर्वमन्त्री हृदयेश त्रिपाठी पनि नयाँ दल गठनको अभ्यासमा जुटेका छन् ।

काठमाडौं प्रेससँग कुरा गर्दै त्रिपाठीले आफ्नो नेतृत्वमा छिट्टै नयाँ पार्टी घोषणा गर्ने तयारी भइरहेको बताए । उनी अहिले ‘स्वतन्त्र राजनीतिक समूह’को संयोजकका रूपमा राजनीतिमा छन् ।

नयाँ पार्टी स्थापनाको प्रकृया अन्तिम चरणमा रहेको त्रिपाठी बताउँछन् । ‘हामी नयाँ पार्टी गठन गर्ने प्रक्रियामा छौँ,’ उनले भने ‘अहिले त्यसकै प्रक्रियाका लागि विभिन्न काममा जुटेका छौँ। पार्टी घोषणा गर्ने तयारी अन्तिम चरणमा छ ।’

आफ्नो पार्टी क्षेत्रीय नभई राष्ट्रियस्तरको हुने उनले जानकारी दिए । र, पार्टी गठन प्रक्रिया सकिएलगत्तै घोषणा गर्ने त्रिपाठीले बताए । राजनीतिक दलसम्बन्धी अध्यादेश आएर दुईवटा पार्टी स्थापना भइसके पनि त्यो एमाले र जसपा विभाजनको परिणति मात्र भएको उनको भनाइ छ । र, आफ्नो दल कुनै पार्टी विभाजनबाट गठन नहुने उनी बताउँछन् ।

नयाँ दल गठनमा आफू विगत अढाइ वर्षयता प्रकृयामा रहेको उनको भनाइ छ । ‘करिब अढाइ वर्ष अघिदेखि नै पार्टी गठन गर्ने योजना थियो,’ उनले भने, ‘पार्टीका दस्तावेजहरू निर्माणलगायत सबै काम सम्पन्न भइसकेको छ । यसको धरातलमा साथीहरूसँग सल्लाह गर्ने, समावेश हुन चाहेका व्यक्तिहरूको विचार र धारणा बुझ्ने, ठाउँ–ठाउँमा पुगेर समर्थक, शुभचिन्तकहरूसँग कुरा गर्नेलगायत काम भइरहेको छ।’

आफ्नो पार्टीमा नयाँ र पुरानो पुस्ताका राजनीतिकर्मी र कार्यकर्ताहरू रहने उनले जानकारी दिए । पार्टीको नामबारे भने कुनै निर्णय भइनसकेको उनको भनाइ छ । त्रिपाठीको दलको राजनीतिक कार्यदिशा पनि समाजवाद हुनेछ ।

गत आम निर्वाचनमा त्रिपाठीको समूहले एमालेको चिह्न सूर्य लिएर चुनावमा सहभागी भएको थियो । ८ वैशाख ०७४ मा मधेशकेन्द्रित ६ वटा दल मिलेर राष्ट्रिय जनता पार्टी (राजपा) स्थापना भएपछि उनी त्यस एकता प्रक्रियाबाट बाहिरिँदै स्वतन्त्र राजनीतिक समूह बनाएर राजनीतिमा थिए ।

उनी लामो समय तत्कालीन नेपाल सद्भावना पार्टीमा आबद्ध भएर राजनीतिमा सक्रिय थिए । दोस्रो मधेश आन्दोलनपछि गठित तराई मधेश लोकतान्त्रिक पार्टी (तमलोपा)का संस्थापक नेता पनि थिए, उनी । तमलोपा राजपामा विलय भएपछि भने स्वतन्त्र समूहका संयोजकका रूपमा सक्रिय छन् ।