चाडबाडका बेला सामान निर्यातलाई प्राथमिकता दिन चिनियाँ पक्षलाई नेपाली महावाणिज्य दूतको आग्रह

काठमाडौं, भदौ ९ : नेपालमा चाडबाडको मौसम सुरु भएकाले चीनतर्फबाट सामान निर्यातलाई प्राथमिकता दिन नेपाली पक्षले आग्रह गरेको छ ।

चिनियाँ पक्षसँगको बैठकमा ल्हासास्थित नेपाली महावाणिज्य दूत नवराज ढकालले बुधबार यस्तो आग्रह गरेका हुन् ।

महावाणिज्य दूत ढकालले बैठकका क्रममा नेपालतर्फ चाडबाडको समय सुरु भएको चिनियाँ अधिकारीहरूलाई जानकारी गराएका थिए । र, चीनतर्फबाट कार्गोहरूको आवतजावत सहज बनाइदिन उनले आग्रह गरेका थिए ।

यस्तै, चीनको स्वशासित क्षेत्र तिब्बतमा बसोबास गरिरहेका नेपाली नागरिकलाई कोभिड–१९ विरुद्ध खोपमा प्राथमिकता दिन पनि ढकालले आग्रह गरेका थिए ।

महावाणिज्य दूत ढकालका अनुसार तिब्बत स्वशासित क्षेत्रको विदेश मामिला कार्यालयकी महानिर्देशकसँग बुधबार बैठक भएको हो ।

त्यसक्रममा तिब्बतमा रहेका सबै नेपालीलाई बिहीबारदेखि कोभिड–१९ विरुद्ध खोप दिने सहमति बैठकमा भएको छ ।

नेपाल र चीनबीच सामान आवतजावतमा सहजीकरणका लागि लिपिङको सडक निर्माण गर्न र केरुङमा यार्ड विस्तार गर्न चिनियाँ पक्षबाट अनुरोध आएको छ । 

यस्तै, मुस्ताङको नेचुङ नाका सञ्चालनमा ल्याउन चिनियाँ पक्षले आग्रह गरेको छ । ‘म्याटेरियल असिस्टेन्स’को काम अगाडि बढाउन पनि चिनियाँ पक्षले आग्रह गरेको छ ।